TECNOLOGIA
CALIFORNIA, Merca – E filtracionnan cu a tuma luga na 2013 y 2014, tabata tin un impacto ariba cuentanan di 3.5 miyon persona den mundo henter. Yahoo! lo mester paga 50 miyon dollar na daño y perhuicio pa e hacknan masivo cu a tuma luga na 2013 y 2014. E incidentenan a afecta 3.5 miyon cuenta rond mundo y a sali na claridad na 2016.
Cerca di 200 miyon usuario na Merca y Israel cu a wordo afecta pa e ruptura di siguridad a entrega un demanda colectivo contra e compania cu awo ta pertenece na Oath, di Verizon.
Awo a yega na un acuerdo pa cual, e empresa lo tin cu compensa e usuarionan aki na razon di 25 dollar pa hora pa e tempo cu nan a pasa ta resolve e problemanan causa door di e hacking grandi aki. Esunnan cu tin manera di prueba efectivamente e cantidad di tempo inverti den repara e incidentenan aki, lo por ricibi e ekivalente na 15 hora, cual ta 375 dollar y esunnan cu no a documenta of a tene cuenta cu e tempo inverti lo tin derecho di cobra e ekivalente di cinco hora di tempo, cual ta 125 dollar.
Di otro banda, esunnan cu tin un cuenta di email Premium lo por solicita e pago di 25%. E compania lo mester core cu e gastonan di e abogadonan involucra den e caso sumario y di abona dos aña di servicio di monitarisacion di credito pa e 200 miyon usuarionan cu a entrega un demanda.
E acuerdo aki lo mester wordo aproba pa e hues Lucy Koh, cu lo revisa e documento dia 29 di november proximo. E acuerdo aki lo wordo paga door di Oath y Altaba, doñonan di Yahoo.