Sra. Ray-Anne Hernandez presidente y coordinador di e festival un canto pa nos Himno y Bandera, ta splica mas tocante e festival.
E festival e aña aki lo tuma luga riba Plasa Betico, den e weekend 10, 11 y 12 di Maart, hunto cu Festival di Adulto. Dus esaki ta encera cu tanto infantil y hubenil, y adulto ta cay mesun weekend. E aña aki, a duna compositornan un tiki mas tempo, y e inscripcion lo ta basta mas laat pa motibo cu carnaval a caba poco mas laat. Inscripcion pa e festival lo ta dia 2 di Maart, lo tin 4 categoria den infantil/hubenil cu ta categoria di 4 pa 6 aña, 7 pa 9 aña, 10 pa 12 aña y 13 pa 17 aña. Si no tin mucho interes den e categorianan aki, lo haci e cambionan necesario.
E inscripcionnan lo tuma luga na The Man Cave Barber Lounge, for di 6 or di atardi pa 8 or di anochi. Lo tira lot e mesun anochi pa 8.30 di anochi. Riba e dia aki tambe lo bay determina exactamente ki dia y cuanto dia lo mester pa e festival. pero ta depende di cuanto inscripcion lo tin pa e festival aki.
Sra. Ray Ann Hernandez, a gradici propietarionan di The Man Cave Barber Lounge, cu ta un compania local cu ta duna sosten na nos cultura y asina aki ta duna oportunidad pa haci e inscripcion na The Man Cave Barber Lounge. Dia 2 di Maart, loke nan mester di cada participante, ta nan nomber, fecha di nacemento y un comprobante, cu por ta un ID, paspoort of un carchi AZV. No lo keda cu copia ni nada,pero ta djis pa confirma nan fecha di nacemento.
Tambe lo bay mester titulo di cancion, ritmo di cancion, nomber di compositor, nomber di areglista. Y tambe 7 copia di e letranan. Esaki mester wordo entrega hunto cu e letranan. Aki riba mester tin tur e informacion, manera ya menciona. Si no cumpli cu tur e rekisitonan aki, no lo tuma e inscripcion.
Tambe Sra. Hernandez a pidi pa tur mucha ta presente, ya cu lo lansa un like & share campaign pronto, pa promove tanto e muchanan cu e festival mes. Nan mester ta presente pa saca potret pa asina hinca e campaña den otro, pa saca e cantante popular riba social media.
Tur hende ta keda cordialmente invita pa bin apoyo nan cantante preferi, pa trece e ambiente y e entusiasmo pa loke ta bay ta e celebracion di nos luna nacional, anticipando nos festival di himno y bandera, den weekend di 10, 11 y 12 di Maart, como tambe dia 18 di Maart cu ta nos Dia Nacional.
Por ultimo Sra. Hernandez a splica e ubicacion di The Man Cave Barber Lounge, cual ta situa riba Sasakiweg, den mesun edificio di Eagle Bowling Palace.
Pa loke ta participantenan, e festival ultimo añanan a crece. A cuminsa cun’e na Centro di Bario Tanki Leendert, pero cu a bira chikito. Tambe a haci e festival e ultimo tres añanan ariba Linear Park, y esaki tabata un exito total. Pero e aña aki, e comision a haya invitacion pa haci e festival e aña aki ariba Plasa Betico Croes, cual ta un luga ideal pa haci un festival di e indole aki.
Tambe lo tin feria cultural, pero mas den curso di e dianan cu ta bin Comision Celebracion Nacional lo duna mas informacion. Tambe lo tin diferente tent di cuminda, bar bon surti. Tur esaki ta cay bou encargo di Comision Celebracion Nacional.