Recientemente un grupo grandi di hoben a bishita Parlamento di Aruba pa asina conoce e organo halto aki di Pais Aruba mas di cerca. Pa nos di Fraccion di MEP tabata un placer pa por a duna splicacion riba e funcionamento di Parlamento y contesta pregunta di e hobennan di e hala hubenil di MEP, HOT y e alumnonan di klas 2 di EPI sector economico cu a bishita Parlamento. E ta sigur un satisfaccion pa mira cu cada dia e interes di nos hobennan ta bira mas grandi pa locual ta politica na nos Pais. Sigur awo cu hopi hoben ta bay vota pa prome biaha, nan tin hopi pregunta riba e sistema electoral, e trabou Parlamentario y nan kier sa ta ki influencia nan como hoben por tin riba gobernacion di nos Pais. Nos di Fraccion di MEP ta contento di por a intercambia cu e grupo grandi aki di hoben y ta encurasha mas hoben pa laga nan stem wordo scucha den politica di nos Pais. Mayoria desicion cu awe ta wordo tuma lo mester wordo carga pa e generacion mas hoben di nos Pais y pa e motibo aki e interes y participacion di nos hobennan den politica ta di suma importancia. Nos ta gradici tur hoben cu a haci pregunta y ta spera di por topa y scucha mas stem di nos hobennan interesa den politica di nos Pais.