Nos Pueblo ta pasando den duro. Practicamente tur dia tin atraco na nos Pais. Tur hende tin miedo, riba caya y hasta den nan propio cas. Criminalidad ta creciente y a bay totalmente for di man. Pueblo literal- y figurativamente ta stik den criminalidad, ya cu ni porta of bentana di cas nan ta durf di habri mas pa e miedo di wordo atraca.
Na un momento di desespero asina un Pueblo ta spera compasion y accion di su Gobernantenan. Pueblo ta spera di mira y scucha su Promer Minister (PM) mustra su convivencia y bin dilanti brinda e palabra di aliento y mustra Pueblo e trabounan duro cu ta wordo haci pa nos Pais por bolbe bek na e trankilidad cu semper nos a conta cune. Pero na Aruba nada no ta normal mas. Enbes cu PM Eman duna Pueblo cara, e mandatario a biaha bay Colombia pa conta paharito. Un falta di respet grandi na e Pueblo y specialmente na esnan cu a pone eynan.
E acto di PM Eman ta prueba cu e mandatario aki no ta interesa den e bon gobernacion na beneficio di e Pueblo aki. Minister Eman kier djies haci show pa por keda na poder. Tur cos tin mas prioridad cu e bienestar di nos Pueblo, e biaha aki ta conta paharito na Colombia tabata tin mas prioridad pa PM Eman. Y nos Pueblo ta keda stik den criminalidad.
Pesey Pueblo harbi wowo y mente, un PM cu ta conta paharito na Colombia y laga su Pueblo atras ta stik den miedo pa criminalidad creciente, no merece ta na cabes di e Pais aki. E aña aki laga nos ban percura pa normalidad bin bek den gobernacion y ban manda Minister Eman cas pa e por sigi conta paharito na smaak riba su propio gasto y no abusando di fondo publico schaars di e Pais aki.