Parlamentario, drs. Mervin Wyatt-Ras, durante reunion publico pa trata e presupuesto di Asuntonan Social y Labor e.o. a elabora encuanto problemanan social cu no a cuminsa awe sino tin di haber cu cambionan den nos sociedad relata na e mentalidad mas individualista, cambio di constelacion di nos famianan dor di cual tin mas famianan mixto y famianan cu un solo mayor na cabez. Dor di e cambionan y tur desaroyo den mundo cu influencia grandi di medionan di comunicacion y social nos hendenan ta comunica menos directo cu otro. E control social a bira menos. Mayornan y otronan rond di e mucha ta traha. Tur esaki hunto cu e presion di e peso financierno ta haci cu nos hendenan ta desaroya problemanan social. En especial den ultimo tempo e peso financiero ta grandi ariba nos famianan dor di medidanan financiero cual tin su consecuencia tambe ariba mas problemanan di indole social-psicologico, manera stress, depresion y por conduci tambe na violencia den tur sentido. Wyatt-Ras y fraccion di AVP a sostene cu ta bin un fondo pa yuda sector social, esaki ta un novum y fraccion di AVP ta duna e bon ehempel cu ora ta trata nos muchanan y hobennan ta para banda di nos pueblo manera semper AVP a bin ta haci cu diferente proyecto na favor di esnan vulnerable, esnan den dificultad y nos hubentud.
Pa garantisa cu nos cuidadanonan cu ya caba ta vulnerable no ser afecta mas duro ainda cu e peso di costo di bida mas halto dor di cual nan entrada no lo yega pa cumpli cu gastonan di tur luna di huur, awa, coriente, pago di skol, gas y gasoline ta necesario y urgente pa duna nan un sosten. Di e forma aki e fraccion a presenta un mocion pa hisa e suma di bijstand, gehandicaptenuitkering, schoolkinderentoeslag, y di reparatietoeslag pa asina alivia esnan humilde den nos comunidad y ta spera cu nan final di tratamento di e presupuestonan por haya sosten di henter Parlamento pa esaki.