Dialuna, dia 14 di November 2016 ta Dia Mundial di Diabetes (“World Diabetes Day”), cu e tema “Wowo riba Diabetes”. Aruba tambe ta pone atencion riba e campaña di conscientisacion aki cu diferente actividad.
Instituto Medico San Nicolas (ImSan) ta cuminsa cu su ‘Health Check’ for di 9’or di mainta y lo sigui te cu 12’or di merdia. Durante e ‘Health Check’ por controla sucu, presion y colesterol. E ‘Health Check’ lo sigui despues for di 4’or di atardi te cu 7’or di anochi. Tambe lo tin demostracion di ‘low carb foods’, video y charla riba e topico diabetes y medicina.
For di 7’or te cu 8’or di anochi lo tin presentacion tocante wowo y diabetes door di sra. Nancy Ramirez. E anochi lo termina cu un quiz y diferente premio atractivo.
E Bus di Salud di IBiSA tambe ta activo riba dialuna, Dia Mundial di Diabetes. Esaki lo ta staciona riba e parkinglot di AZV na Camacuri, unda bo por pasa pa haci un ‘Health Check’ completamente gratis! Riba e bus ta controla sucu, presion, colesterol y Optica Leslie lo tey pa controla e presion di wowo.
Pa loke ta keda di e luna di November e Bus di Salud lo sali mas biaha pa duna servicio den diferente bario rond di Aruba pa haci e controlnan aki gratis. Cu e actividad y materialnan, lo pone enfasis riba e importancia di ‘screening’ pa diagnostica diabetes tipo 2 tempran. Diagnostica na tempo ta importante pa asina por cuminsa tratamento y reduci e riesgo pa complicacionnan serio.
Na Aruba, 1 di cada 2 adulto cu diabetes no ta diagnostica! Mayoria di e casonan aki tin diabetes tipo 2. Hopi di e hendenan cu no ta diagnostica ya caba por tin complicacionnan manera: malesa di wowo, malesa di curason y ader, malesa di riñon of malesa di e nervionan. IBiSA ta conscientisa comunidad di Aruba pa “Actua awe pa cambia mañan”!