HAMILTON, Bermuda – E wowo di horcan Nicole, di categoria 3, ta move na e momentonan aki atrabes di e islanan Bermuda, situa dilanti e costa oost di Merca, cu bientonan maximo sosteni di 120 miya pa ora, segun Centro Nacional di Horcan di Merca a informa.
Nicole, cu diaranson, den poco ora a pasa di horcan di categoria 2 pa 4 riba e escala di Saffir-Simpson (di un maximo di 5), ta 10 miya oost di e archipielago, segun e boletin di CNH, pa 3’or di atardi diahuebs.
E horca ta desplaca pa noordwest riba 16 miya pa ora y e meteorologonan ta premira cu “e centro di Nicole lo aleha for di Bermuda awe tardi.”
E compania di coriente a informa cu cerca di 2 mil di su abonadonan a keda sin suministro di energia debi na e dañonan provoca pa e bientonan fuerte y awasero torencial cu e area a registra pa motibo di Nicole, cual efectonan por a wordo sinti riba gran parti di e archipielago Atlantico aki di 70 mil habitante.
Servicio Nacional di Horcan di Bermudas a señala cu, aunke e potencia di e ciclon a debilita durante mainta, respecto na e pasada anochi, ta spera cu Nicole lo ta e horcan cu, cu mas forsa a golpia e archipielago desde Fabian na 2003, cu a causa dañonan grave material, en especial riba e capital Hamilton, unda cu ta concentra 20 mil persona.
E agencia publico a alerta cu Nicole por a paar den su paso riba Bermuda tornadonan peligroso, pa loke a insisti cu e poblacion pa nan tuma medidanan maximo di siguridad posibel pa evita dañonan inecesario.
Minister di Siguridad Nacional di Bermuda, Jeff Baron, a adverti riba horcan Nicole cu e lo ta un menasa pa e archipielago y cu e poblacion tin cu uma tur e medidanan di siguridad necesario pa su proteccion.
Fuente: NTN24