E Centro Internacional di Investigacion riba Cancer (CIIC), organo specialisa di e Organisacion Mundial di Salud (WHO), ta premira cu pa 2060 lo tin mas di 35 miyon di caso nobo di cancer, loke lo ilustra un aumento d 77% compara cu e 20 miyon di caso calcula den 2022, segun un comunicado publica diahuebs riba nan website.
“E crecemento rapido di e carga mundial di cancer ta refleha tanto riba embehecimento como e crecemento di e poblacion, como tambe e cambionan den e exposicion di hende n’e factornan di riesgo, varios di cual ta asocia n’e desaroyo socioeconomico,” e texto ta bisa.
Den e sentido aki, ta señala cu tabaco, alcohol y obesidad como factor clave di un mayor incidencia di cancer, mientras cu contaminacion atmosferico ta sigui ta un di e factornan principal di riesgo medioambiental.
Den termino di carga absoluto, ta spera cu e paisnan cu un indice halto di desaroyo humano (IDH) ta experimenta e mayor aumento absoluto di incidencia, cu un prevision di 4,8 miyon di caso nobo den 2050 compara cu e calculacionnan di 2022.
Desbalansa significativo
No obstante, CIIC ta señala, e aumento proporcional di e incidencia ta mas notabel den e paisnan cu un IDH abao (aumento di 142%) y den esunnan cu tin un IDH medio (99%).
Tambe, ta pronostica cu mortalidad pa cancer den dicho pais casi lo duplica den medio di e presente siglo.
“E impacto di e aumento aki no lo ta sinti di manera uniforme den e paisnan di diferente nivel di IDH. Esunnan cu ta dispone di menos recurso pa confronta su carga di cancer lo ta esunnan mas afecta,” Freddie Bray, hefe di e Subdivision di Vigilancia di Cancer di CIIC, a splica.
Di su parti, Cary Adams, director di e Union Internacional Contra Cancer, ta kere cu, a pesar di e progresonan realisa den deteccion trempan di cancer y den e tratamento y atencion di pashent, ta existi desbalansa significativo den e resultadonan di e tratamento di cancer, no solamente entre e regionnan di mundo cu entrada halto y abao, sino tambe dentro di e paisnan mes.
“E luga caminda un persona ta biba no mester ta determinante. Ta existi herment cu ta permiti e gobiernonan duna prioridad n’e atencion oncologico y garantisa cu tur hende tin acceso na servicio accesibel y di calidad. No ta trata solamente di un cuestion di recurso, sino di boluntad politico,” el a añadi.