En conexion cu dia mundial di diabetes, Instituto Biba Saludabel y Activo (IBiSA) hunto cu Kidneys 297 y Fundacion Diabetes Aruba ta organisa un workshop di dos dia cu e tema “Maneha bo diabetes”.
E prome dia ta un anochi informativo cu topico manera: maneho propio di diabetes, haci escohencia saludabel y come consciente. Workshop lo wordo duna dor di dr. Sharline Vis (dokter di cas) y Charlene Leslie, dietista di IBiSA. Fecha ta diamars 14 di november di 6.30pm pa 8.30pm na MFA Paradera.
Riba e siguiente dia, diaranson 15 di november, lo tin un les di cushinamento bou guia di tres dietista. Akinan lo siña prepara receta saludabel y economico pa diabetico. E les aki lo ta di 6.30pm pa 8.30pm y ta tuma luga na Centro di Bario Tanki Leendert.
E workshop ta wordo ofreci como un pakete di dos dia. Pa participa na e workshop por registra na IBiSA (Frankrijkstraat #1) di 7.30am te cu 12.00pm y di 1.00 te cu 4.00pm. Ta pidi un contribucion di Afl. 15,= pa por participa na tur dos dia. Registracion ta cera dia 13 di november.
E evento aki ta conta cu sosten di Directie Volksgezondheid y Plataforma Promocion di Salud.
Pa mas informacion por tuma contacto cu Charlene Leslie via mail [email protected] of por yama IBiSA na 582 4987.