The Boy Problem den nos sistema di enseñansa y di educacion en general, ta birando un problema grandi dia pa dia. E situacion aki ta referi na e problema cu tin den enseñansa unda cu e cantidad di mucha homber cu ta bira ‘drop out’ ta mas grandi cu e cantidad di mucha muhe. Na Merca por ehempel nan a constata cu 2/3 parti di e muchanan cu ta bay scol special ta mucha homber. Na America Latina y den Caribe tin mas mucha muhe cu ta caba scol primario y secundario. Tambe tin menos mucha homber ta sigui un estudio riba nivel di HBO y Academico. Por lo general si den un pais e nivel di educacion di bo pueblo ta limita, esaki ta trese hopi problema social-economico cune. Esaki ta nifica cu un cantidad grandi di bo pueblo no tin un entrada pa por cubri tur nan gastonan. E mesun grupo aki ta cay den varios adiccion y no ta pone atencion na educacion di nan yiunan ni na cas ni na scol. E problema den famia y pobresa den bario ta bira mas grandi ora un pueblo ta menos educa.
Pa por haci algo na e situacion aki tur esnan concerni den educacion di un mucha mester asumi nan responsabilidad den e proceso y tambe nan mester duna cuenta y rason pa esaki. UNESCO ta di opinion cu: “Educacion ta un responsabilidad comparti pa nos tur. Un responsabilidad di tur gobierno, scol, maestro, mayor y sector priva.”
Mayoria bes un mucha muhe ta siña for di chikito cu nan mester ta respetuoso, flexibel y comporta nechi y un mucha homber hopi biaha no ta haya mes tanto empuhe pa tin un bon comportacion. Ademas ora cu un mucha homber tin mal comportacion hopi biaha no ta haci nada na dje pa medio di e frase “mucha homber ta keda mucha homber”. Sin embargo ta notable cu un bon comportacion di un mucha ta yuda nan score miho na scol, pero tambe despues ora nan bay traha.
Mirando e echo cu na Aruba tambe tin un cantidad mas grandi di mucha homber cu ta cay for di e systema di enseñansa, y cu den nos enseñansa avansa, mbo y universitario tin mas tanto mucha muher compara cu mucha homber, Minister di Enseñansa, Dr. Rudy Lampe a tuma e iniciativa pa dedica atencion na e problematica aki. Dia 23 di mei proximo UNESCO Aruba lo organisa un workshop special pa tur trahado social y interne begeleiders den enseñansa secundario. Meta di e worshop aki ta pa hunto cu e sector social y di educacion paden y pafo di scol trata e problema aki. Hunto lo bay yuda formula un plan di accion cu ta bay describi: con pa yega na solucion? Pa medio di kico por logra solucion? Na unda mester traha riba solucion? Kendenan y cua instancianan mester yuda carga e responsabilidad y compromete nan mes pa por logra cambio y efecto positivo den desaroyo di nos mucha hombernan na Aruba?
Na e workshop aki lo tin un panel cu ta consisti di Sr. Richenel Ansano (representante di UNESCO Corsou), Sra. Enid de Kort (terapista systemico na Departamento di Asuntonan Social), Francis Groeneveldt (Fundacion pa Hende Homber) y Stichting FRERA. Den presentacion di e panelistanan lo discuti e problematica di educacion di mucha homber na cas, den famia, na scol y pafo di scol. Lo trese dilanti kico ta e problemanan cu mucha homber y hende homber ta hayanan confronta cune pa motibo di ta menos educa. Tambe lo trese dilanti kico ta importancia di terapia pa hende homber y guia pa mucha homber den scol y pafo di scol. Mas importante ainda ta pa hunto purba indica ta kico falta pa haci y kico mester haci pa yega na realisa e trabounan cu keda indica den e workshop.