Recientemente Cabesante y Lidernan di diferente Centro di Cuido a participa na e workshop “Ora desaroyo cana otro of no bon… Kico pa haci?
Desaroyo di un mucha por cana bon pero tambe e por tin contratiempo of kizas no ta ok. E por ta dificil pero sigur e ta importante pa sa na ki momento algo no ta ok.
Kico pa haci si e comportacion di un mucha ta cana diferente? Kico ta e señalnan cu e mucha ta dunando mi como lider? Kico su necesidadnan ta? E comportacion ta pertenece na su fase di desaroyo? Con mi ta observa un mucha? Esaki ta algun pregunta cu e lidernan ta puntra nan mes den nan trabou diario.
Un mucha ta pasa mayoria ora di dia den un Centro di Cuido, pa motibo aki como lider bo mester por conoce e fasenan di desaroyo di mucha y por reconoce na ki momento esaki no ta canando manera e mester cana. Bo por encontra muchanan cu tin diferente comportacion y esaki por tin su retonan.
E siman anterior a ofrece e topico aki na e cabesantenan. Como cabesante, e ta importante pa abo cu ta na cabes di e Centro di Cuido, tambe sa tur loke ta sosode den bo Centro. Si un lider tin un preocupacion tocante un mucha, e cabesante lo mester sa kico ta un desaroyo cu ta cana bon pa asina duna e lider conseho y e guia necesario ariba esaki.
Pa e motibo aki, drs. Swinda Dumfries, Orthopedagoog di Jeugdgezondheidszorg a wordo invita pa fungi como orador durante e workshop pa asina duna diferente informacion riba e preguntanan menciona y hopi mas. E cursistanan a recibi diferente tools cual nan por usa den nan trabou cu mucha y mayor.Ta importante pa lider como cabesante tin e mes un informacion pa asina ambos ta para riba e mes un liña. Trabou cu mucha ta dushi, pero e por tin su retonan. Pa e motibo aki, nos ta gradici e cabesantenan y lidernan cu a tuma e oportunidad pa participa na e workshop y alabes nos ta invita esnan cu no a haya chens e biaha aki, pa participa na e ripiticion di workshop “Ora desaroyo di mucha ta cana otro of no bon”, cual lo wordo ofreci na 2019. FPNM ta sumamente satisfecho con e workshop a cana y ta gradici drs. Swinda Dumfries pa su presentacion. Nos ta felicita tur e cursistanan cu a participa den e workshop aki pa compronde nos muchanan mas mihor. Boso ta importante y tambe ta aporta na e desaroyo di nos muchanan.
Pa mas informacion tocante nos cursonan por tuma contacto cu nos na
588-0856/583-4247 of bishita nos Facebook page.