Ateliers ‘89 Fundacion, ta invita bo persona na e workshop di pintamento y tecnica di dibuho cu artista internacional Gustavo Paris. Cada persona tin nan manera individual di expresa nan creatividad y nan inteligencia. Pues cu e workshop aki E artista kier yuda pa busca cada persona su concepto contemporaneo individual. Di e manera aki ta spera di conecta ideanan creativo cu tecnicanan fundamental di trahamento di pintura y dibuho durante e tres simannan di e workshop.
Den ultimo añanan e uzo di medionan mescla den pintura a basha abou e muraya entre pintura y dibuho, cual ta creando expresionnan artistico mas profundo y lucrativo. Gustavo Paris su propio trabou ta den e mesun esfera aki, mirando cu su trabou ta habri nan mes den espacio. De hecho, nan ta similar na paisahenan cosmico, fragmento di galaxianan captura den nan existencia eterno y continuo.
Den cierto di e obranan, e artista ta introduci un seccion di espacio como un background, evocando e tantisimo soñonan genera pa espacio den mente humano durante historia. Den otro e ta mustra un strepi horizontal cual ta crea un contraste di tension combina cu e pintura su strepinan dinamico. Asina e artista ta sugeri y contribui na e idea cu paisahenan “humano” no mester ta organico si no cu por crea nan, soña di nan y diseña nan — hasta den ambientenan extra-planetario.
Gustavo Paris lo supervisa bo como participante den e workshop pa desaroya bo propio expresion por medio di ehercicio di dibuho y pintura, culminando na final cu un exhibicion. E artista ta haya cu cada creador tin e habilidad di transforma e mundo, maske ta leu of si ta cerca di su mes, pa cambia algo den algo mas significativo di loke ta aparece.