Presidente di Wilhelmina Kanker Fonds, sra. Lily Prins, ta elabora riba e crecemento den casonan di cancer y nan rifa pa por recauda fondo.
Sra. Prins ta splica cu nan ta hayando sosten, pero no manera nan a spera. E rifa aki mester a wordo efectua dia 1 di April, pero mirando cu nan no a bende suficiente nan a hal’e pa 2 di September. Riba e dia aki nan ta bay saca e premionan. Nan ta spera cu comunidad por acudi na oficina di Wilhelmina Fonds of na Cura Cabay Lottery unda cu nan tin e bukinan di rifa tambe. Esaki ta mesun cos na Italo Arubano na Cumana. E rifa ta costa 25 florin. Hopi hende ta bisa cu e ta mucho caro, pero tin dies premio fabuloso. E prome premio ta un auto Kia Picanto di 2018 ful ekipa. E di dos premio ta dos pasashi pa Amsterdam cu KLM. E di tres premio ta un “mystery travel” di Maduro Travel. E di cuater premio ta un air conditioner Panasonic di Unicon. E di cinco, di seis, di shete y di ocho premio ta ta premionan di Super Food, Caribbean Mercantile Bank (CMB), SETAR, cual ta premionan di mil florin cu un persona por gana y haci bon uzo di dje. Nan tin premio di Boolchand’s y Ling & Sons. Hopi hende ta kere cu Whilhelmina Fonds ta haci e rifanan aki pa luho. Aña pasa ora cu nan a colecta durante luna di April, nan a haya no mas cu 29,000 florin. E aña aki el a bira 75,000 florin. Ora nan wak kico e gastonan tabata di Januari pa Juni, e gasto mas grandi di Wilhelmina Fonds ta e gasto di cuido na cas, pasobra ora cu nan enfermeranan bay na cas di e pashent terminal, eynan a bay practicamente ful e placa. E ora ey ta bin acerca tur e pasashinan cu tin cu cumpra p’e di dos acompañante cu tin cu bay cerca e pashent ora e ta den exterior. Nan ta distribuyendo e prothesennan ainda cerca e damanan cu tin mester di dje. Tur hende cu yega na porta di Wilhelmina Fonds no ta paga nada. Tur cos ta gratuito. Danki na Dios y comunidad Arubano, nan por traha. Tur miembro di Wilhelmina Fonds ta traha di forma boluntario. Nan no ta cobra salario. Pero p’e enfermeronan mester percura pa nan tin nan gasolin y otro gastonan cu nan auto.
Sra. Prins ta haci un yamada na comunidad Arubano. Nan ta na oficina tur dia te cu 6’or di atardi pa bende e rifa. Nan a pasa den un momento poco fastioso, caminda un persona cu a tuma dos buki, el a manda e bukinan bek, pero nunca el a duna e placa. Ta cosnan cu tur fundacion ta pasa aden. Na e momentonan aki, segun sra. Prins, tambe tin algo fastioso cu ta sosodiendo, pero nan ta bay wak con nan lo resolv’el e. E ta purba cu tactica pa mira con por resolve esaki pa nan por yega na e suma necesario. Hopi hende ta acudi na Wilhelmina Fonds pa yudansa. Sra. Prins tabata babuca di mira cuanto hende ta yama y cuanto hende ta den dolornan cu Wilhelmina Fonds no por cera nan portanan. Nan mester ta constantemente pendiente di comunidad. Cancer a crece. Awendia tur cos ta cancer. Sra. Prins ta corda cu añanan pasa un miembro di Wilhelmina Fonds a bis’e cu awor cu sra. Prins tin e mando, e ta bay spanta di mira un dia cuanto caso ta bay tin di cancer. Y prepara cu porta no ta bay tin placa pa por yuda. Antes nan tabata bisa cu nan tin suficiente pa cubri cinco aña. Pero awor nan tin net pa cubri dos of tres aña so. Mester spaar lo mas cu nan por, pasobra ta yega un momento cu tin cu sigui duna comunidad e respaldo cu nan merece.
Segun sra. Prins, keto bay tin cancer di pecho cerca hende muhe y ultimamente hopi cerca hende homber. Y tur e otro cancernan a subi. Cancer tin un lapso di 10 pa 15 aña. Tin otronan cu ta nace cun’e. Tin casonan ta alarmante y algo mester wordo haci. Dor di yuda cu e evento di e rifa, esaki ta yuda Wilhelmina Fonds haya mas fondo pa por sigui yuda mas famianan den necesidad. E temporada cu hopi hende tin cu biaha ta net e temporada halto. E prijs di pasashinan ta bira halto. Y ningun agencia di biahe ta bay duna descuento ni maske ta un fundacion pa cancer, pasobra e no ta den nan man. Pero sra. Prins ta mustra cu apesar di tur e dificultadnan, nan lo sigui brinda e asistencia necesario cu amor pa comunidad.