E aña aki ta grandi pa Wit Gele Kruis y ta celebra su 58 aña di existencia. Sr. Gino Goeloe, director di Wit Gele Kruis ta splica mas di e desaroyonan di celebracion y tambe di e retonan di salud cu nos tin nos dilanti.
Nan no kier laga e oportunidad aki pasa, pa duna e comunidad e danki pa e sosten den e 58 añanan aki y tambe pa informa pueblo cu Wit Gele Kruis t’ey pa yuda nos grandinan y nos babynan, como tambe nos babynan y nos adultonan. Den cuadro di esaki, nan lo ripiti un programa cu nan a pasa na canal di television tres aña cu tabata e 55 aña. Y e aña aki, esaki lo wordo pasa un biaha mas na tur e canalnan den e simannan benidero.
Nan lo bin cu algo special, cu ta un programa special dedica na Sr. Jan Meelis, cu ta e fundador di Wit Gele Kruis, cu a bay laga e mundo aki na 21 di Mei 2017. Wit Gele Kruis ta recorda Sr. Meelis, ya e ta e fundado di e Wit Gele Kruis y cu a yudanan te nan unda cu nan ta awendia.
Sr. Goeloe a sigui bisa cu den e delaster añanan cu e grandinan ta bira mas grandi, cu ta algo hopi bunita pa nos pais Aruba. Pero ora bo bira grandi, bo ta bin cu complicacionnan. Y esey Wit Gele Kruis a ripara den nan rapport anual 2016, unda nan e malesa di Alzheimer ta birando mas grandi. E malesa di stroke tambe ta birando mas grandi y esey kiermen cu tin mas hende den cuido den e parti di cuido di hende grandi. Esey ta algo cu e comunidad mester sa, ya cu esey ta bay cu costo.
Hopi biaha, den e caso aki AZV cu ta un stichting cu ta sigura henter e pueblo. Pero ora di bira mas grandi, ta jammer pa bisa, bo ta bay cu complicacionnan cronico, sucu y presion halto. Y esey ta algo cu Wit Gele Kruis ta purba di yuda tur nos grandinan cu curason te unda cu nan por.
Ta keda na cada grandi pa cuida nan curpa y biba un bida saludabel tambe. Un bida saludabel ta un bida, cu den e caso aki, e mei ora movecion pa dia, ta importante. E ocho glas di awa pa dia ta importante. Den e grandinan ta importante pa baha e cuminda vet, como tambe e salo cu ta algo masha gusta cerca nos grandinan.
Sr. Goeloe ta felicita Movecion Ta Bida, cu a bin cu’n congreso cu ta bay specificamente pa nos grandinan. Aruba henter mester bishita e congreso aki, pa bin tende con bo por cuida bo curpa miho pa bo biba un bida mas largo. P’esey tambe ta e aña aki, tin dos programa cu nan ta bay lansa cu ta un programa riba e malesa di Alzheimer cu ta bay cuminsa na November. Aki Wit Gele Kruis lo bay ilustra e malesa kico e ta, kico e ta nifica pa un famia y eynan lo laga diferente specialista papia. Como tambe cuidadonan di famia, over di e cuido di su mayornan, como tambe departamento di cuido di bario di Wit Gele Kruis, cu lo duna algun tips con pa cuida un mayor na cas.
E aña aki lo sigui cu e parti di Bo Curason Ta Den Bo Man, ya cu e malesanan cardiovascular ta e asesino mas grandi na Aruba. Na fin di October y November lo bay cuminsa na tur canal di television, unda cu Wit Gele Kruis lo bay atrobe, siña e comunidad educa nos comunidad, pa cuida na curpa na e miho manera posibel, segun director di Wit Gele Kruis, Sr. Gino Goeloe.