Sra. Liesbeth Arendsz, coordinadora di cuido na cas na Wit Gele Kruis tin mas di 13 aña ta traha cu nan. E ta invita henter pueblo di Aruba pa bin pa dos anochi informativo cu nan tin na Theresita center na San Nicolas. Sra. Arendsz ta amplia mas ariba esaki.
Durante e anochi informativo aki, nan lo bay papia riba CVA cual ta stroke den boca di pueblo. E tema principal ta con bo ta cuida un ser keri cu a sufri un stroke. A organisa dos anochi pa esaki. E ta bay ta dia 11 y 12 di October, for di 7’or pa 9’or di anochi. E prijs ta 10 florin pa miembro, pa tur dos anochi y esnan cu no ta miembro, ta 20 florin pa tur dos anochi.
Segun Sra. Arendsz a bisa, a cuminsa ripara cu e pashentnan cu mas malesa cu ta bin cas, ta esunnan cu ta sufri di un stroke, hunto cu Alzheimer. Y hopi biaha famianan no sa con pa sigui y cuida nan sernan keri. Door di esey ta haci e anochi aki. E ta pa duna informacion, conseho y demostracion tambe di e coleganan di Wit Gele Kruis. Tres trahado di WGK, zuster y broeder, lo bay duna e anochi aki. Algun di e topiconan ta, kico ta pasa den bo celebro ora bo haya un stroke. Kico por ta e consecuencianan fisico y mental. Tambe ta duna conseho tocante cuido na cas di un persona cu a haya un stroke. E personanan tambe cu lo duna nan parti ta dokter Lacle di Hospital. E ta Zaalarts, hunto cu e revalidatie team centrum, cual ta un fisiotherapeuta, un ergotherapeut y un trahado social. Nan tur lo tey den e anochinan aki pa elabora riba e topiconan aki. Bini uno bini tur, pasobra ora cu un persona haya un stroke, ta su famia semper tambe tin cu tene cu e consecuencianan. Hopi importante pa nan sa tambe kico nan ta spera y con pa sigui. Stroke, e consecuencianan ta keda. E por bira menos, pero semper nan mester siña cun’e y e famia tambe, con pa cuida nan hendenan. Asina kier duna apoyo pa mehora e calidad di cuido y e bida despues di un stroke.
Sra. Liesbeth Arendsz a sigui splica cu en total nan ta cuida mas of menos 150 hende na cas. Bo por bisa un 20 persona ta hendenan cu tin stroke. Fuera di esey tin Alzheimer, diabetico, parkinson y otro malesanan cronico. Cu e stroke aki bo ta mira cu toch e ta un grupo basta grandi. P’esey ta organisa e anochinan aki. A yega di haya hende di 50 pico aña ta haya stroke caba, te cu 70, 80 y hasta 90 aña. Esaki hopi
biaha tin di haber cu peso, malesanan cronico, con bo a hiba bo estilo di bida. Tur e partinan ey tin un rol sigur. Por duna mas conseho riba parti di comemento. E nutricionista por duna mas informacion riba esey. E movemento tambe ta hopi importante y tambe cuida bo curpa di tur cos. E stress tambe ta hunga un rol grandi, con pa siña deal cun’e. Tur e parti ey ta hunga un rol con pa yega na un stroke.
Tin un motibo pa scoge Theresita Center. Mayoria biaha Wit Gele Kruis ta haci nan charla riba cuido na cas, etc. na Centro Kibrahacha. Pero hopi biahe esnan di pariba a pidi pa haci’e na Theresita Center. E ora a dicidi pa haci’e pa esnan di p’ariba. Fuera di Centro Kibrahacha por haci’e mas caminda. Ta depende di e luganan, segun Arendsz. Por haci’e na Centro di Bario Playa pabao, pasobra eynan tambe hopi actividad ta wordo organisa. Ta depende e pedido di e clientenan, kico nan kier. Asina Sra. Liesbeth Arendsz a splica.