Un delegacion di Aruba tabata na nos isla ruman Corsou cu 28 representante di diferente fundacionnan y departamentonan di Gobierno pa tende un congreso di derechonan di mucha y participacion di e hoben den comunidad. Sr. Gino Goeloe, director di di Wit Gele Kruis ta relata.
E topico tabata Derecho di Mucha en general, pero tambe a focus ariba crianza di mucha y e participacion den nos comunidad. Na e evento a topa cu otro gruponan di St. Maarten, Saba, St. Eustatius, Bonaire y Corsou cu tabata e anfitrion. Grupo di Aruba tabata hopi grandi compara cu otro islanan, pero tambe bon prepara unda cu nan presenta nan ‘Vision di Crianza’ y tambe nan plannan pa futuro.
E congreso aki a wordo organiza como un Task Force di Reino, cu a tuma luga aña pasa na Bonaire y awor Corsou caminda cu tin un deliberacion pa otro aña tuma luga na Saba of St. Maarten.
Mester bisa cu e team di Aruba a bay hopi bon, unda cu nan por intercambia cu e otro islanan ruman. Cada isla a presenta un proyecto di nan isla, cu ta algo cu ta bayendo hopi bon. Sr. Goeloe a participa na un, cu tabata di St. Eustatius, unda cu e ta un isla hopi chikito, 3 mil habitante a bin cu un program hopi bon cu trabou den parti di autismo pa traha cu e mayornan y participa den e guia profesional di e muchanan.
Cu esaki por a ripara cu Aruba por siña hopi di e otro islanan tambe y esey ta e bedoeling, pa por uni y traha hunto cu otro, siña di otro. Por ehempel, na St. Eustatius ta hopi gefocused riba e mayornan, pa nan participacion den e guia di e yiu. Na scol nan ta obliga e mayornan bin un anochi pa mayornan. Aki na Aruba, tur cos cu ta “vrijblijvend”. tin mayorn ta bin un anochi pa mayor, y tin ora nan no ta bin. Anto net e mucha cu ta bayendo malo ta esun cu su mayor no ta presenta na scol.
Riba e punto aki na St. Eustatius ta handle esaki di otro manera. E scolnan ta keda pusha cerca e mayornan, pa nan bin. Tambe nan ta follow up, y asina por bisa cu nan ta “stalk e mayornan”. Tambe nan ta organisa evento – y actividadnan dirigi na e mayornan.
Finalmente a tende di algun di e cabesantenan di scol na Aruba cu hopi biaha mayornan no ta cumpli y no ta presenta na scol, segun Sr. Gino Goeloe, director di Wit Gele Kruis.