Wilhelmina Kankerfonds ta cuminsa bek cu su campañanan pa 2019 y den palabranan di Sra. Lilly Prince tur e recaudamento di fondo aki no tin finnan lucrativo pa cune sino ta destina totalmente pa yudansa di pashentnan cu ta acudi na Kankerfonds pa ricibi ayudo pa cu e malesa di Cancer. Pero naturalmente cu ora papia di Wilhelmina Kankerfonds, e prome cos cu tur hende ta pensa riba dje ta Cancer y mester ta conciente cu e ultimo añanan e cifra di personanan cu ta sufri di e malesa aki a subi drasticamente. E gastonan ta birando dia pa dia mas hopi pero Wilhelmina Kankerfonds ta haya sa di e personanan cu ta bati na porta di e fundacion pa haya ayudo, pues nan ta haya sa na momento cu un persona acudi pasobra e fundacion no ta conta cu estadistica riba con e situacion ta actualmente riba Aruba. Antes Kankerfonds tabata haya tur informacion pero mester bisa bon cla cu te cu na 2016 tabata haya e informacionnan aki di cuanto pashent tabata wordo detecta cu Cancer. Awendia como fundacion cu ta inverti tempo, inverti placa a base di donacionnan, ta e ultimo pa sa con e situacion ta y basicamente ta haya sa solamente ora e patient bati na porta di Kankerfonds. Aunke cu e situacion den dado caso por ta duro caba pa e persona, toch danki na Dios y cu ayudo di comunidad, Kankerfonds por juda toch ainda. Ta papia semper ora di cuminsa un campaña y e campaña di 2019 dunando un relato con cos a bai den 2018. Mester bisa cu esun di 2018 sigur sigur a bai hopi mas miho cu 2017. Ora colecta riba caya, hopi hende tin e pensamento cu ta recolecta masha hopi placa pero a logra recauda 35 mil Florin den e campaña di 2017 mientras cu na 2018 esaki a aumenta hopi caminda a keda recauda 520.533,46 Florin cu ta representa un aumento di mas cu 35 porciento compara cu 2017. E aumento aki ta danki totalmente y solamente na loke e keda recauda pa e evento di “Crossing for Hope” caminda cu landadonan Arubano a landa for di Punto Fijo, Venezuela pa Savaneta, Aruba dia 11 di November 2018 y a sera e cuenta aki dia 31 di Maart di e aña’ki y el a jega na un suma di 130.626 Florin. Tambe Kankerfonds ta confirma cu su rifa anual, cual a cuminza cune 4 aña pasa y e accion di April tambe ta importante pa nan p’asina jega na fondonan necesario pa gastonan anual. Entradanan di Wilhelmina Kankerfonds pa loke ta e April Actie tabata 78.716 Florin mientras cu e rifa a trece aden 127.500 Florin. Ora papia di rifa esaki ta loke a keda recauda totalmente pero mester menciona cu e premio, den e caso aki e auto, a wordo paga completamente, aunke cu a logra haya un descuento, pero na final mester kita e placa di e auto for di e suma recauda. Mientras cu donacionnan di companianan grandi ta jega na total di 85.136 Florin y otro entradanan cu e fundacion ta ricibi ta ora di entiero di un persona caminda famianan ta pone box disponibel tambe ta wordo conta aserca. Sra. Prince ta enfatiza cu tur e placa aki ta bai directamente banco, pues no ta keda ni ta maneha placa den oficina di Wilhelmina Kankerfonds. Pero mescos cu tin entrada, tin gastonan caminda cu esakinan den 2018 a keda mas of menos mescos cu 2017. E gastonan total ta 347.640 Florin cu ta dos porciento menos compara cu 2017, mientras cu e gasto mas grandi cu Wilhelmina Kankerfonds tin ta “thuiszorg”. Esaki ta nifica e cuido cu pashentnan terminal ta haya na cas caminda cu Wilhelmina Kankerfonds ta drenta pa duna famia un man. Akinan tin un acuerdo mutuo pero naturalmente e cuminda etc. e famia tin cu duna e pashent. Ora cu papia di esaki e gastonan di “thuiszorg” ta 40 porciento di e gastonan total. Ademas di gastonan di protesis ta casi 16 prociento di e gastonan total. Tambe tin “hulp verlening”, projectonan di prevencion y ayudonan di transporte, caminda cu pa varios aña caba ta traha conhuntamente cu Lite Live pa cu transport di pashent, cual gasto aki ta como un 17 porciento tambe. Pa loke ta e resto di gastonan cu ta un 15 porciento ta pa actividadnan di recaudamento di fondo manera “Ride for the Roses”, aña pasa a bini “Crossing for Hope”, rifa y e gastonan normal di funcionamento diario p’asina Wilhelmina Kankerfonds por move ta jega na un 7 porciento y ta akinan ta mira unda cu e placa cu ta wordo recauda ta bai. Danki Dios e edificio ta uno propio cu ta haci cu tin un gasto menos pa deal cune. Sra. Prince a bisa enfaticamente cu akinan comunidad ta mira unda e placa ta bai y no den saco di ningun hende, manera dado momento ta wordo bisa, sino simplemente directamente den comunidad bek.