E fin di siman aki lo tuma luga un evento musical organisa pa algun musiconan hoben cu tin su meta pa yuda Wilhelmina Kanker Fonds pa cual aki Sra. Lily prins ta splica.
E meta di e evento musical aki ta eigenlijk ta un soño di un cabayero den nos comunidad, cu ta bin cun’e for di aña pasa. Ta trata di Sr. Livio Hermans. E tabata kier a bin cu un atardi musical na beneficio di Koningin Wilhelmina Kanker Fonds y esaki a wordo masha aprecia pa e fundacion pa motibo cu e momento aki esunnan cu lo participa como musiconan den e presentacion aki, ta hobennan cu ta colabora di parti di Scol Musical Rufo Wever y Cas di Cultura. E hobennan aki ta esunnan cu lo bay presenta y tambe Sr. Livio Hermans tambe lo presenta temanan musical.
Prome cu pausa, Sra. Lily Prins a splica cu lo tin musicanan clasico. Y despues di e pausa, lo tin musica di nos mes di parti di artistanan conoci den nos comunidad, manera Sr. Padu Lampe, cu ta tata di Cultura, Sr. Toti Arends, Dr. Wever y tambe Sra. Margareth Hage. Tambe lo tin presentacion di Sr. Johnny Croes.
E presentacion lo ta den Cas di Cultura, den e sala chikito. Y e ta bay ta diadomingo awo, dia 5 di Maart y lo cuminsa pa 5 or di atardi te cu 7 or di anochi. E sala chikito ta carga 100 persona, y pa Sra. Lily Prins ta sigur cu nan lo yena e sala aki, y entrada lo ta 25 florin. Pero lo tin hobennan cu lo kier bin y pa nan lo tin prijs special.
Entradanan lo ta obtenibel na Plasa Book Shop, como tambe na Oficina di Wilhelmina Kanker Fonds y si por, tambe lo tin carchi obtenibel na porta.