Londres, GRAN BRETAÑA- E portal di filtracion WikiLeaks awe a difundi datonan di un supuesto programa scondi di hacking di CIA Mericano, como parti di un serie di shete entrega y a revela cu e consulado na Frankfurt ta e base di operacionnan cibernetico na Europa.
E portal, dirigi pa e Australiano Julian Assange, a sigura cu su serie “Vault 7”, cual a wordo estrena awe cu e capitulo “Year Zero (Aña Cero)” y cu ta abarca e periodo di 2013 pa 2016, ta “e mayor filtracion di datonan di inteligencia di historia”.
Un ekipo dentro di CIA a desaroya un software di spionahe cu ta infecta smart tv di Samsung, poniendo e tvnan riba un “supuesto off” pero toch ainda por scucha combersacionnan y manda esakinan pa spionnan Mericano, segun WikiLeaks. E programa yama “WeepingAngel”, a wordo crea cu e yudansa di e agencia di spionahe Britanico, MI5, segun e portal.
Aworaki ta imposibel pa un persona normal haya sa si nan telefon of computer of nan television a wordo gehacked door di CIA.
WikiLeaks tin un historia largo di publicacion di documentonan autentico cu a wordo horta of gehacked for di agencianan gubernamental, corporacionnan y individuonan poderoso. Sinembargo, e ultimo informenan aki no por a wordo verifica pa autenticidad door di expertonan independiente.
Fuente: EFE/CNNMoney