WGK: Scol Saludabel mester ta pa tur scol basico

Presion halto ta un di e principal causanan di morto na mundo. Na Aruba hopi hende ta fayece di ataca di curason y stroke, cu ta relata na problemanan cardiovascular. Esaki ta loke cu Gino Goeloe, di Wit Gele Kruis a splica den un declaracion.

Esaki ta un aspecto di salud cu Wit Gele Kruis a concentra hopi riba dje, den e servicio cu nan ta brinda. E ta un tema cu sector salud aki na Aruba ta duna hopi atencion. WGK ta bay hopi den bario cu conscientisacion di presion halto y praktijk ondersteuners di dokternan di cas tambe ta vigila e pashentnan aki hopi di cerca.

A pesar di tur esey e casonan na Aruba ta halto, den porcentahe, pa loke ta presion halto. Goeloe ta splica, e tin hopi di haber cu stress, humamento, colesterol halto, sobrepeso (obesidad) y poco ehercicio. Tin hende a cuminsa cana ultimo añanan pero ainda no a yega na unda mester ta. Y, el a bisa, abuso di alcohol ta hunga un rol tambe den presion halto.

Por cuminsa haci cambio den e forma di come, menos vet y menos salo. Ta preferibel haci cuminda na cas mes. Hospital ta atende semanalmente tres caso di stroke y di ataca di curason. E cifra aki mester baha. P’esey mester pone hopi enfasis riba prevencion y esaki no ta haci suficiente. Por ehempel,aworaki tin 12 scol saludabel y mester expande esaki pa tur scol basico. “WGK ta keda ripiti, aki den ta unda cu gobierno mester sigui hinca placa. Si kier preveni malesanan cronico, cuminsa na kleuterschool cu Scol Saludabel. Mi deseo ta pa aki 10 aña Aruba  ta un Happy & Healthy Island. Cambio di actitud di hende ta tuma hende, pero nos ta spera cu pa aki un decada ta cuminsa mira esaki.” Un mucha saludabel ta manda e mensahe aki tambe pa su mayornan of esnan na cas.

Comments

comments