Cada aña ta celebra “World Wetlands Day” (WWD) riba 2 di februari recordando e beneficionan cu nan ta provee, e beneficionan ta encera, awa pa bebe, awa pa agricultura, biodiversidad cu nos ta depende riba dje, recreacion/atraccion, oportunidad turistico y cultural y proteccion contra impacto di cambio di clima cu ta mas frecuente y intenso. E tema di WWD di e aña aki ta: “Wetlands and Climate Change”. En conexion cu e dia aki, Ministerio encarga cu Desaroyo Teritorial, Infrastructura y Medio Ambiente ta hay’e sumamente importante pa trece luz riba e importancia di e dia aki.
Tur aña riba e fecha aki ta conmemora firmamento di tratado di Ramsar na e ciudad Iranes Ramsar den aña 1971. Den cuadro di esaki tur aña ta scoge un tema di enfoke. E aña aki e tema di conscientisacion tin un enfoke fuerte riba e aspecto di cambio di clima cu ta tumando luga mundialmente y e consecuencia cu esaki tin pa paisnan.
Kico ta Wetland?
Un Wetland ta un area/tereno cu ta satura cu awa, sea permanente of durante cierto temporada of ta inunda frecuentemente. Wetlands ta absorbe awa den tempo di hopi yobida y proteha nos costanan contra mal tempo
Un Wetland/ Saliña ta un area extremadamente valioso pa nos medio ambiente pa diferente motibo: Reducion di inundacion den e areanan aki (por ehempel: corda situacionnan di inundacion den pasado den area di Palm Beach Noord). Tambe biodiversidad y area na unda hopi especie di Aruba pero tambe pafo di Aruba ta bishita y biba y flora y fauna) Wetlands ta promove bienestar di e ciudadano y ta mehora calidad di aire den area cu un densidad di poblacion halto. E combinacion di nos rooi nan, tankinan, saliñanan, Bubali Plas y Spaans Lagoen ta forma base di e infrastructura ‘muha’ di Aruba. Awa no ta yobe tur ora na Aruba, sinembargo ora cu awa yobe e ta basha hopi den un tempo relativamente corto, cual sa causa inundacionnan. Den e caso aki e funcion di e areanan menciona ta pa gara y maneha e capacidad di awa (manera un spons). Tin diferente tipo di saliña na diferente sitio y como tambe den area mas popular manera area di hotel.
Mundialmente paisnan cu ta wordo considera rico y cu ta den adelanto, ta paisnan cu banda di e importancia di e aspecto economico, ta enfoca tambe riba biodiversidad di e medio ambiente. Realidad ta cu e crecemento di poblacion, urbanisacion y necesidad di espacio, careteranan entre otro, ta pone hopi presion riba e infrastructura acuatico rond mundo y na Aruba tambe. Considerando e reto aki, ta importante pa crea conscientisacion tocante e balor di e areanan aki.