Politica guia pa principio, ta un politica cu ta produci desaroyo, prosperidad colectivo y oportunidad pa tur cu tin ambicionan grandi. Politica tin e poder pa transforma sociedad. Den transcurso di epoca politica a divesifica internationalmente y no semper cu e consecuencia desea. Principionan manera solidaridad, convivencia, equidad y responsabilida colectivo a wordo sacrifica pa crecemento economico desbalansa, bataya pa poder y mal uzo di poder pa beneficio personal. E sintoma di e politica deficiente aki tambe nos ta experiencia na Aruba. Ta momento pa politica na Aruba wordo guia pa e Bon Comun cu ta trece desaroyo positivo pa cada cuidadano, di tal forma cu tur cuidadano ta sinti cu su necesidad ta wordo siribi pa un politica cu ta pone causa colectivo prome cu interes personal. Aruba mester reconcilia bek cu e “BON COMUN” cu ta inspira cada actor principal den nos comunidad pa duna nan aporte na un causa comun nobo.
Cada sirbidor publico of esnan cu ta aspira un funcion politico mester compronde e rason pa cual nan ta yama pe. Meta di un politica etico y servicio publico semper mester ta relata na un causa husto. For di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Hopi ta e discusiónan tocante reforma económico, reforma social y te hasta reforma democrático, manera nos ta mira relata na e discusión tocante e implementación di e Landenpakket pero e discusión cu lo conduci na transformación di nos sociedad ta completamente ausente. Nos tin cu habri e discusión tocante e reforma di e pensamento político y moral cu lo ta e punto di orientación pa tur decisión político y maneho riba tur tereno.
Pa garantiza cu nos comunidad tin un speransa nos mester impulsa temanan manera E Bon Común como guía pa maneho. E bon común ta similar na e aspiración colectivo di nos comunidad. E beneficio di cada decisión tuma mester wordo sinti pa tur hende, y no un grupo specifico; un maneho económico cu ta crea oportunidad y mihor condición laboral pa tur comerciante y empleado, un infrastructura y espacio publico cu ta ofrece oportunidad comercial y recreo tur cu ta desea di utilisa esakinan, un sostén social cu ta garantisa dignidad esnan mas vunerabel y un enseñansa cu ta garantiza un formación completo intelectual y personal di nos hobenan.
Ta momento pa cambio e tono politico y enfoca ariba un politica constructivo cu ta inspira y crea speransa. Fundacion Digna Lacle Herrera conhuntamente cu Plataforma Hobenan Profesional y fraccion di AVP a tuma iniciativo pa nos refleciona ariba idealnan politico cu ta duna un base na e transforamcion di nos comunidad cu nos ta desea. Nos orientacion ta inicia diahuebs awor 29 di September pa 7or di anochi den e AULA di EPI. Un invitacion special na tur sector den nos comunidad y tur cuidadano cu ta desea di enrikece nan conocemento y sera conoci cu e concepto politico “ The Common Good”.
