CARACAS, Venezuela – Desde un concentracion masal riba e autopista Francisco Fajardo di Caracas, lider di oposicion y gobernador di Miranda, Henrique Capriles, a fiha un plazo pa e gobierno di Nicolas Maduro pa dentro di e “proximo oranan” anuncia e fecha di e referendum revocatorio: “Esaki no ta un plazo indefini, mi ta bisa bosonan bon cla, señornan di Gobierno of boso ta permiti pa restitui e hilo constitucional of nos ta marcha dia 3 di November pa Miraflores.”
“Una bes di cana ta papia rond (Maduro), gara e telefon y ordena sra. Tibisay Lucena cu den e proximo oranan pone e fecha di e 20% pa tur e Venezolanonan por bay y pone nos fingerprint y pa e pueblo Venezolano dicidi,” el a expresa.
Capriles a anuncia cu oposicion no lo reuni cu e mediadornan pa e dialogo na Isla di Margarita, Nueva Esparta. “Diadomingo nos no ta bay Margarita. Nos kier wak si Maduro ta tribi bay na e beach El Agua y manda un potret di doña Cilia den bikini,” el a bisa.
Pa loke ta e peticion di e opositornan di e marcha diaranson pa Miraflores, Capriles a sostene cu e Venezolanonan cu ta den interior di e pais, tambe mester tin e oportunidad y e derecho di mobilisa te cu e Palacio Presidencial. “Nos no ta loco, akinan ningun hende ta aparece na esun cu ta den Palacio di Miraflores (…) E gobierno aki a perde lo mas importante, cu ta e pueblo,” el a manifesta.
Pa por lo menos tres ora, personanan a marcha for di seis punto di Caracas.
Puntualmente pa 9’or di mainta, opositornan a concentra pacificamente den e avenida Los Cerdos den la Florida, Santa Monica, distribuidor Santa Fe di e autopista Prados del Este, avenida Francisco de Miranda na altura di e Parke Cristal y Unicentro el Marquez. Sin embargo un contingente di Polis Nacional Bolivariano (PNB) a impedi e paso na esnan cu a concentra den e avenida O’Higgins den El Paraiso.
Como den otro mobilisacionnan convoca pa oposicion, Metro di Caracas a suspende su servicio den por lo menos 10 stacion, mientras cu riot tabata impedi e paso di esnan cu ta dirigi pa e capital for di Guarenas, Guatire y La Guaira.
“Nan no lo bay kita nos derecho pa protesta” y “si por” ta e consignanan cu e asistentenan na e mobilisacion a grita; mayoria tabata tin bisti pec
hinan tricolor y bisti na blanco.
Fuente: NTN24