BRASILIA, Brazil- E welga di chauffeurnan di truck cu a cuminsa siman pasa na Brazil, a cuminsa perde forsa dialuna. Pero e crisis severo di desabastecimento causa pe protesta ta sigui. E impacto economico di e turbulencia aki no ta conoci ainda.
Gobierno siman pasa a anuncia un acuerdo cu e chauffeurnan di truck cu finalmente no a concretisa. Diadomingo el a bolbe informa di un acuerdo cu e sindicatonan pa pone fin na e crisis genera pa e falta di entrega di tur tipo di producto.
E acuerdo nobo aki a wordo splica pa e minister di Finanzas, Eduardo Guardia, cu a detaya cu e propuesta ta inclui un rebaho riba e prijs di diesel di 0,46 real (casi 0,13 dollar) pa e siguiente 60 dianan. Esaki lo mehora e oferta anterior, cu a wordo rechasa pa e sindicatonan.
Tambe ta propone e eliminacion di un di e impuestonan cu tin ariba combustibel y otro beneficionan relaciona cu e ‘toll’ cu e chauffeurnan di truck ta paga, cual a wordo acepta pa welguistanan.
Sindicatonan, cu siman pasa a cuminsa un protesta pa subida constante di diesel aplica pa compania estatal Petrobras mei mei di turbulencianna di e mercado internacional di crudo.
Fuente: EFE