Durante e weekend cu a pasa, Aruba Volleyball Association a tene e Weganan Final di e COPA AVA 2017 cual a tuma luga ariba e Canchanan di Volleyball di Centro Deportivo Betico Croes. E diferente categoria a conoce nan Teamnan Campeon y Sub Campeon y na final di e anochi Presidente di Aruba Volleyball Association Sra. Filomena Curiel hunto cu e Lider di Campeonato Sra. Medelin Sapuana a haci entrega di e respectivo Copa y Medayanan na e Teamnan ganado.
Den Categoria U-16 Mucha Muhe, e Team di GAZELLES cu Coach Junny Jones a gana e Team di SV DAKOTA cu e score di 2-0 y asina titula Campeon di Copa AVA 2017 y SV DKOTA cu Coach John van der Lee a keda Sub Campeon.
Den Categoria U-20 Cabayeros, e Team di Spartans La Fama I a triunfa ariba e Team di Spartans La Fama II cu e score di 2-0 y asina Spartans La Fama cu Coach Elmerlindo Robles de Medina a bay cu ambos Copa tanto esun di Campeon como esun di Sub Campeon.
Y den Categoria U-20 Damas, e Team di VENUM cu Coachnan Errol Yrausquin y Debby Alleyne a gana 2-0 for di GAZELLES pa asina ricibi e Copa di Campeon mientras cu GAZELLES cu Coach Julisa Jones a keda na di 2 luga como Sub Campeon.