Studiantenan di Aruba, Boneiru, Kòrsou, Sint Maarten, Saba i Sint Eustatius, ku a kaba di yega Hulanda, lo bishitá Madurodam i Kas di Anne Frank komo promé parti di un programa di Fundashon WeConnect pa sera nan konosí ku Hulanda i ku historia i kultura hulandes.
22 di september e grupo lo bishitá Museo Anne Frank i e kas kaminda Anne Frank i su famía a biba skondí durante di Dos Guera Mundial i dia 24 di oktober nan lo bishitá Madurodam, ku e aña akí ta rekordá 100 aña di nasementu di e héroe yu di Kòrsou George Maduro.
Komo organisashon ku ta promové komprenshon i aseptashon entre kulturanan di Reino Hulandes, Fundashon WeConnect ke trese e hobennan ku a kaba di yega Hulanda den kontakto ku historia i kultura di e pais kaminda nan lo biba i studia e próksimo añanan. Kordinadó di proyekto di Fundashon WeConnect, Tanja Fraai: “No por ta ku nan ta biba varios aña na Amsterdam òf Den Haag sin sa kiko di Dos Guera Mundial a nifiká pa Reino Hulandes.” Den kaso di Madurodam e konekshon ku Kòrsou ta bon kla: e dianan aki tin un eksposishon grandi tokante George Maduro einan.
Anne Frank Huis:
Na 2015 e bishita na Kas di Anne Frank, situá na Prinsengracht na Amsterdam, a hasi hopi impreshon riba e studiantenan. E aña aki tambe tin programa interesante ta warda e grupo, ku entre otro un introdukshon di direktor di e museo, Ronald Leopold. WeConnect ta stimulá e studiantenan pa dokumentá nan impreshonnan di e bishita den forma di entre otro potrèt i video.
Madurodam:
Na Madurodam e studiantenan lo sera konosí ku e parke dediká na e héroe yu di Kòrsou George Maduro. Nan lo tin oportunidat pa pensa i debatí tokante temanan manera balentía, amistat i sakrifisio pa otro, faktornan ku a karakterisá e persona George Maduro. Ademas, Madurodam, pa esnan ku no konos’é ta un miniatura di Hulanda, inkluyendo aeropuerto, haf, kanal i e proyekto pa maneho di awa “Deltawerken”, interesante pa tur hende ku kaba di yega Hulanda.
Ta di dos biaha ku WeConnect ta organisá e programa di sera konosí i atrobe Museo Anne Frank, Madurodam i otro instanshanan a koperá pa por realisá e programa sin gastu pa e studiantenan.
Presidente di Fundashon WeConnect, Paul Comenencia, ta gradesido na Anne Frank Huis, Madurodam i e otro instanshanan ku a bolbe hasi e proyekto akí posibel. “Konosementu di historia i kultura hulandes ta importante pa komprondé e parti aki di Reino Hulandes. Mas trempan bo siña konosé e pais, su kultura, su hendenan i nan kustumbernan, mas éksito lo bo tin durante bo estudio i despues.”