Dialuna ultimo WEB Aruba a bira victima di un atake cibernetico cual a afecta e sistema di automatisacion. A contene e atake rapidamente y asina a limita e efecto riba e sistema. E compania di awa y energia ta sigura cu su produccion di awa y coriente no a wordo afecta; pues no tin motibo pa preocupacion. Mientrastanto ta trahando duro pa mas pronto posibel pone e sistema di automatisacion bek den operacion. Ta pidi comprension di clientenan pa e hecho cu loketnan na Balashi ta cera te proximo aviso. Pa lo cual ta pago di cuenta, por lo pronto esaki ta solamente posibel na banco y via online banking.
E ultimo cuenta di awa ta esun di September 2016, cu ultimo dia di pago dia 8 di November. Teniendo consideracion cu clientenan, gerencia a dicidi di hala e fecha di dia 8 di November pa dia 15 di November.
E atake cibernetico aki, a sosode por medio di un virus. Esaki ta diferente di un “hack”, na unda un entidad ta penetra e sistemanan activamente. Ta yama e virus aki un “Zero day exploit”. Esaki ta nifica cu practicamente ningun sistema di proteccion tin defensa contra dje ya cu e ta aparece pa prome biaha ariba internet. E virus a cuminsa ataca sistemanan rond mundo diadomingo atardi 6 or pm ora local. E prome paisnan afecta pa e virus aki tabata Alemania, Gran Bretania y Canada y pues desde dialuna Aruba tambe.
Gerencia y empleadonan ta lamenta e suceso y ta hopi consciente di e inconveniencia cu e situacion ta trece cu ne. Na mes momento ta sigura cu WEB tin e situacion bou di control. Pa posibel pregunta por yama WEB su Call Center na 525-4200. Riba WEB su pagina di Facebook ta publica updates pa asina comunidad por keda na altura di e desaroyo.