Den menos cu 3 luna WEB Aruba a finalisa e proyecto pa instala panelnan solar riba dak di Abraham de Veer School na San Nicolas. Diabierna ultimo WEB, den compania di mandatarionan, gerencia y alumnonan di Abraham de Veer School y Openbare Avondleergangen Aruba a entrega e proyecto oficialmente na e scol. E dak solar di e scol ta forma parti di Aruba su ARES, Aruba su strategia di energia sostenibel. Tur esaki lo trece WEB mas cerca di logra su vision di ta Greener, Cleaner y Fuel Oil Free na 2020. E dak na Abraham de Veer School por genera mas o menos 976 kWh, pa dia cual por suministra coriente na 60 cas pa dia.
Cu e proyecto aki WEB ta amplia su red di energia solar uzando e daknan di scol y edificionan publico. Un ‘dak solar’ no solamente lo conduci na un produccion di coriente mas limpi y sostenibel. E ta un ehempel bibo tambe pa conscientisa nos muchanan di e importancia di reduci emision di gas venenoso (CO2) den medio ambiente.
E proyecto na Abraham de Veer School ta forma parti di un proyecto mas grandi cu ta e ‘Decentralized Solar Photovoltaic Integrated Project’ (DSPVIP). E DSPVIP ta consisti di dos proyecto. E prome proyecto ta esun di e panelnan solar riba scolnan y otro edificionan publico cu un capacidad calcula di 2.5 MWp. E di dos proyecto ta consisti di un parke solar grandi cu un capacidad calcula di entre 3 y 5MWp.
Aruba Renewable Energy Strategy (ARES)
E parke solar grandi hunto cu esun di e scolnan riba nan turno ta forma parti di Aruba su strategia di energia sostenibel (ARES). E strategia ARES ta consisti di diferente parti; un di nan ta ARIP, cual ta e plataforma di integracion di recurso. E plataforma ARIP lo hiba Aruba pa e nivel di penetracion di energia sostenibel di 40% – 50% na aña 2018. E team di Utilities Aruba ta preparando diferente proyecto pa ehecuta rumbo pa 2020. Dos parti importante di e plataforma ARIP ta wardamento di energia y mas penetracion di energia sostenibel. WEB, hunto cu ELMAR y otro partner strategico ta cla pa inicia e Decentralized Solar PV Integration Project manera menciona ariba. Pa por mantene e stabilidad di e red, lo instala un sistema di warda energia pa medio di e tecnica di Flywheel. WEB ta orguyoso di por menciona cu e groundbreaking di e proyecto aki lo tuma lugar dia 4 di November proximo y lo keda cla otro aña.