Erick Henriquez, presidente di sindicato SIWA ta conta nos tocante e carta cu a Sali den medionan di comunicacion unda ta refuta e asunto cu WEB lo tin un deal caba cera cu e grupo nobo pa loke ta e asunto di gas. “Nos ta para 100% tras di e director pasobra manera nos tin etendi no tin ningun acuerdo, pa lo tin un acuerdo WEB lo mester ta sinta na mesa tambe ora di e negociacionan, no por negosha cos tras di lomba di hende pasobra na momento cu bo ta haci esey bo ta fout bezig,” segun sr. Henriquez.
Sindicato SIWA ta para 100% tras di e director cu esaki. Tur esaki a origina cu a bini e grupo di gas cu lo traha e planta pariba anto eynan tur movecion a cuminsa pasobra mester negosha riba con lo haya e gas etc. E idea no ta malo segun sr. Henriquez, e ta un bon idea pa tin gas pa WEB y baha gasto di produccion, pero “bo mester sa a base di ki prijs, WEB no sa pasobra no a participa den nada y despues kier yega benta esaki asina, nos tambe tin cu haci calculacionnan di kico e ta y kico e ta bay Sali pa pueblo.”
Mester duna bon informacion y informa kico exactamente ta pasando, y no bisa cu WEB a participa cual no ta berdad manera e articulo di WEB ta desmenti. Aworaki tin tog un trankilidad den trabao mientras ta preparando pa un caso den corte 11 februari venidero. “Nos ta keda profesional , nos ta keda suministra coriente na Elmar y awa pa henter Aruba, cumpliendo cabalmente wardando riba e fecha yega pa nos bay corte pasobra nos ta para ariba cu unilateralmente e cos ki no ta bay asina.” Pasobra si ta asina, segun presidente sindicato SIWA ta expresa, e ora nos ‘a coi awa na Aruba pasobra metemento di gobierno lo ta tur caminda.’
“Nos ta desea pa nan bisa cu loke gobierno a haci no ta na su lugar y pa nan reverse e cos ki bek, eynan nos ta bay y despues nos ta wak con nos ta sinta.”