E transicion di combustibel fosil pa energia sostenibel pa produccion di awa y energia na WEB Aruba ta continua. E meta ambicioso di e compania pa ta 100% independiente di combustibel fosil na 2020, a conduci na desaroyo di solucionnan cu ta ofrece coriente confiabel y pagabel binticuater ora pa dia. Solucionnan asina ta rekeri sistemanan avansa di warda energia pa cera e espacio entre e puntonan maximo di demanda pa energia y di produccion di energia sostenibel.
TESLA
WEB a selecta e compania lider den tecnologia, TESLA, pa provee sistemanan di warda energia rekeri pa desaroya solucionnan pa 100% energia sostenibel. Diabierna dia 18 di November 2016 durante e conferencia Green Aruba VII, e dos companianan a firma un acuerdo den presencia di Prome Minister Mike Eman, Minister di Asuntonan Economico, Comunicacion, Energia y Medio Ambiente, Mike de Meza, y Franklin Hoevertsz, director di Utilities Aruba NV. E prome proyecto pa warda energia den bateria di gran escala lo ta cla na cuminsamento di otro aña y lo sirbi como modelo pa implementacionnan mas grandi ainda, cual lo anuncia den e proximo lunanan. WEB y TESLA otro aña tambe lo implementa ‘Powerpacks’ y ‘Powerwalls’ den e proyecto di Smart Community. Esakinan ta diseña pa sirbi como modelo cu por sirbi despues, den escala mas grandi pa uzo domestico den barionan di nos isla.
Mas penetracion
Di parti di WEB Aruba, manager di proyecto Joseph Everon a splica cu e meta principal ta pa desaroya proyectonan di warda energia, como parti di un strategia di termino largo pa Aruba completo. Consecuentemente, e strategia lo permiti mas penetracion di energia sostenibel y lo conduci na menos uzo di combustibel fosil, na un red mas stabil y na menos gasto di operacion y mantencion di Aruba su planta di energia. E acuerdo cu TESLA ta forma parti di ehecucion di plannan di implementacion riba terminonan cortico, mediano y largo pa asina logra e vision di WEB pa un Aruba Greener, Cleaner y Fuel Oil Free na aña 2020.