Recientemente tabata tin e groundbreaking di e proyecto di WEB Ringleiding 2. Sr. Luis Oduber, director di WEB Aruba NV ta amplia mas ariba e proyecto aki.
E proyecto aki ta cuadra cu e strategia continuo pa ofrece awa. Awa na un manera confiabel, pagabel y sostenibel. Ora cu e ta cla, e tuberia di 7.7 km largo lo conduci na un suministro mas confiabel, y apto pa futuro desaroyo di Oranjestad, e zona di low rise hotel. Y futuro desaroyo den cercania di Avenida Watty Vos.
PROYECTO
Den pasado a busca diferente ruta alternativo pa reemplaza e tubo existente, cu ta suministra e area di Oranjestad y Low Rise Hotel. E ta un ruta cu’n infrastructura hopi complica, cual a trece tardansa den realisacion di e proyecto aki. Mientras tanto, e peticion pa saca e parti di tanki riba tereno di waf na Oranjestad, a haci e reto mas grandi ainda.
Mirando e desaroyo den nos infrastructura actual, WEB Aruba a dicidi di haci di e oportunidad pa amplia e red di distribucion di awa paralelo cu e Proyecto Watty Vos Boulevard. WEB lo instala un tuberia di 12 duim, na comienso di e proyecto, net dilanti di airport y lo termina dilanti di e edificio existente di Sun Plaza na Oranjestad.
E proyecto Ringleiding 2 lo tin un largura di 7.7 km y lo reforsa e suministro di awa pa Low Rise Hotel pa futuro desaroyo di Watty Vos Boulevard y adernan cu por suminsitra Oranjestad tambe. WEB lo inverti 4.9 miyon florin den e proyecto aki, y lo tin un duracion di 7 pa 8 luna. Ta planea pa tin ringleiding2 den servicio pa e prome kwartaal di 2019.
E contratista encarga cu e proyecto ta Arubaanse Wegenbouw bou di supervision di e team di distribucion di awa di WEB Aruba NV, cu lo traha hunto cu e.o. DOW, Surveying Unlimited, Elmar, Setar y e team di proyecto Watty Vos Boulevard. Lo ehecuta e proyecto den diferente fase. WEB lo avisa via medionan di comunicacion e inicio di cada fase. Lo cuminsa cu e proyecto den e area di Madiki Kavel, direccion Ponton.
For di aworaki caba, Sr. Luis Oduber, director di WEB kier a pidi comprension y disculpa pa tur inconvencienca cu esaki lo por trece pa trafico como tambe e habitantenan.