“Mi ta orguyoso di tur compania di estatal resortando bou mi, pasobra mi tin varios. Pero mi no tin problema pa admiti cu WEB Aruba N.V. ta un berdadero ehempel pa tur otro”, asina Minister di Turismo, Transporte, Energia y Medio Ambiente, Ing. Mike de Meza, a bisa na ocasion di celebracion di 85 aña di existencia di WEB Aruba N.V.
E sentimento special aki no ta debi solamente na e prestacion di e empleadonan, sino tambe pa e forma con a innova y desaroya, a percura pa un nivel di eficiencia grandi internamente, mientras cu na otro banda ta maneha un crecemento den demanda tanto di awa como coriente.
E no ta un tarea facil, pasobra mientras cu ta realisa inversionnan multi miyonario den ekiponan nobo pa traha mas eficiente uzando menos combustibel, e demanda di otro banda ta sigui aumenta diariamente. Esey atrobe ta percura pa mas inversion, pa por cumpli cu e demanda creciente, mara na nos crecemento y desaroyo economico.
Un ehempel bibo ta reapertura di CITGO, cu antes semper tabatin su propio planta di produccion di coriente pero cu awor lo conta cu servicio di WEB. Pa logra esey tambe tin inversion mara na ekiponan nobo y moderno.
WEB a ultimo añanan a actualisa nan vision y awendia ta enfoca hopi mas riba energia renoba y limpi. Ta cu esey den mente cu awendia WEB no solamente ta tuma un porcentahe di su coriente for di molinanan di biento na Vader Piet, pero tambe awor for di panelnan solar riba daknan di scol y aki rato tambe for di e parke solar na Esso Heights, cu lo bira esun mas grandi den e region aki.
Bisando tur esaki, banda di e cambionan drastico na ekiponan moderno den e planta di produccion di awa y coriente, mara na plannan concreto pa cambia e planta pa traha riba gas, WEB Aruba N.V. no solamente a prueba un diversificacion y crecemento e ultimo 85 añanan, sino tambe cu ta cla pa enfrenta futuro cu hopi mas inversion, progreso, innovacion y crecemento.
“Ta pa e cosnan aki mi mester bisa mi ta orguyoso. Nos maneho e ultimo 8 añanan di ta laga e companianan traha, no saca dividendo anual sino lage aden pa nan por sigui inverti pa sigui progresa, a demostra su frutonan. Mi ta desea WEB Aruba N.V. y tur su empleadonan….hopi pabien y hopi aña mas di servicio di calidad na nos comunidad”, asina Minister Ing. Mike de Meza a finalisa bisando.