Den un conferencia di prensa organisa diabierna 30 di augustus, 2024, e gigante di seguro Sagicor y e organisacion dedica pa detecta Cancer di Pecho BOB Aruba a lansa “We Care, We Walk”, un Funwalk di 5K pa crea consientisacion y tambe pa recauda fondo pa yuda den e lucha contra Cancer di Pecho.
E caminata lo tuma lugar durante luna di Consientisacion di Cancer di Pecho, ariba Dia Internacional di Consientisacion di Cancer di Pecho, diadomingo 13 di October y lo cuminsa pa 6:00 di mainta na e Parking Lot di Cuts & Curves Gym na “Paperclip rotonde” di Watty Vos Boulevard. Tur fondo recauda na e evento lo bai pa BOB Aruba y lo wordo inverti den proyectonan di conscientisacion cu e meta pa educa y motiva nos comunidad tocante e importancia di participa den e programa di screening di pecho. Di e forma aki asistiendo BOB Aruba pa yega na mas hende muhe den comunidad.
Diantha Nuesch di BOB Aruba ta elabora: “Screeningnan ta hunga un rol hopi importante den e maneho di prevencion di Cancer di Pecho. E proposito ta pa detecta iregularidadnan den e pecho, cu por indica cancer den un fase trempan. BOB Aruba ta invita e hende muhernan entre 45 y 75 aña pa participa, cada dos aña, den e programa di screening. BOB Aruba ta uni cu Sagicor durante e Fun Walk di conscientisacion aki, pa ilustra e importancia di colaboracion, celebra bida y duna bek na comunidad na un manera alegre, activo.”
Sra. Nuesch a sigui bisa, “Nos kier consientisacion y controlnan regular mester bai man den man cu un estilo di bida activo y saludabel. Ki mihor manera pa logra esaki cu un Fun Walk di 5K pa e comunidad di Aruba. Nos tur conoce un persona, of varios hende, cu a wordo diagnostica cu Cancer di Pecho of cu a perde e bataya contra Cancer di Pecho. BOB Aruba ta invita hoben y grandi, famianan, gruponan corporativo y gruponan di amigo pa bisti na color ros y join e “We Care, We Walk” Fun Walk di 5Km y ta recorda e hende muhenan, cu ta bin na remarke, pa traha nan cita di screening.”
E participante cu mihor creacion na ros, lo gana un premio.
Papiando den e conferencia di prensa, Sr. Randall Croes a duna detayenan tocante e evento planea, incluyendo pakico Sagicor a scoge pa join den nan obhetivonan. El a bisa, “Aña pasa, nos tabata anfitrion di un Fun Walk hopi exitoso pa celebra nos di 35 aniversario y nos a compronde e ora ey cu nos comunidad ta berdaderamente interesa den formanan activo pa keda saludabel, mientras ta haci actividadnan cu nan ta disfruta di dje hunto cu nan famia y amigonan. E caminata aki ta logra e obhetivo ey, mientras tambe ta permiti nos recauda fondo pa BOB Aruba, un organisacion cu ta haciendo trabounan importante den e area di deteccion di Cancer di Pecho na Aruba. Nos tin 500 lugar disponibel pa e personanan cu lo kier cana na e prome edicion aki di “We Care, We Walk.”
El a splica tambe cu Luna di Conscientisacion di Cancer di Pecho of “Pinktober” manera e ta wordo referi na dje door di e compania, ta un di e eventonan di responsabilidad social corporativo mas grandi riba calendario di Sagicor y cu cada aña e compania ta sostene organisacionnan no gubernamental y ta anfitrion di actividadnan den cada pais na cual e ta haci negoshi den Caribe.
Sales Manager Sra. Sonja Velthuizen a splica cu registracion pa e evento ta habri caba y personanan por manda un email na [email protected] pa inscribi, cu bo nomber, edad y number di telefoon. E tarifa di inscripcion ta Afl. 25 pa tur adulto y pa mucha di 12 aña of menos ta Afl. 15. E gasto di inscripcion por wordo paga na oficina di Sagicor of na Ibisa (for di 9 di september, solamente cu swipe).
Sr. Croes a continua “Nos ta hopi gradici na tur e sponsornan, cu a aporta cu e caminata aki cu nan donacion y of regalando “Door prizes”: Cuts & Curves, High Performance, Starbucks, AIB Bank, Compra/Tropic Alé, Hyatt Regency, Hyatt Airport , Lycro Engraving, Biofresh & Etnia Nativa. Esaki ta cera e circulo di duna bek na comunidad. Tur participante lo ricibi un medaya “We Care-We Walk” como recuerdo di nan participacion. Despues di e caminata e entretenimiento ta sigui na e parkeerplaats di Cuts & Curves (Seroe Patrishi), unda tur e ganadornan di e door prize lo wordo anuncia. E Fun Walk aki ta yena cu musica, bon energia, boothnan di informacion y premionan sorpresa.”
Sr. Rafael Perez Guardiola di Ibisa Aruba, kende tambe tabata presente na e rueda di prensa, a splica tur cos tocante e ruta, stacionnan di waterbreak y e medidanan di seguridad tuma.
Pa mas informacion con pa traha bo cita di screening di Pecho por tuma contacto cu BOB Aruba: yama durante orario di oficina 588-1212 of manda un mensahe di WhatsApp na e number 594-5020.
Pa mas informacion tocante di con pa cumpra carchi pa e tremendo caminata aki, por fabor tuma contacto cu Sagicor: Manda bo nomber, fecha di nacemento y number di telefon pa [email protected] pa inscribi of bishita oficina di Sagicor personalmente. Lo bo ricibi un email di confirmacion cu mas detaye despues.
Laga nos cuida y cana y pasa bon.
