Tur cos ta cla pa Campeonato AA start sali awe nochi, 26 Augustus pa exactamente 7:30 PM na Crismo Angela – Nadi Croes Ballpark na Sta. Cruz. Manera ta custumber, semper nos ta busca un baluarte den e deporte pa asina aki por dedica e campeonato na su persona. ABBA a delibera bastante, paso e nomber nan cu a wordo menciona ta hende nan cu a aporta hopi di nan tempo den baseball, pero hopi di nan no tabata como hungador sino como dirigente, cu majoria biaha ta wordo lubida, na un manera di bisa.
Gerardo Kock, naci na Aruba dia 23 April 1936, a cuminsa hunga baseball na grandi. No algo comun caminda mayornan ta laga nan yiunan hunga un deporte desde chikito. Despues di a forma parti di Oranjeboom pa 2 aña bou maneho di def. Cecil Grovel. Despues a bin cambeo caminda lo a forma mas team y akinan a tuma decision cu un hungador no por maneha e team na e mes un momento. Despues di votacion, un decision unanime a haci cu Gerardo a haya e encargo pa bay maneha e team. Den un sentido el a hay’e obliga di stop di practica e deporte pero e la tuma e encargo di manager asina na serio cu e la lanta su mes un team cual tabata “Little Rock”. Su team a participa den campeonato A klas pa 3 aña, den cual e la logra titulo nan di subcampeon y den e ultimo aña, e la titula campeon.
Durante 3 aña, Gerardo a inverti su mes un capital, paso e tempo ey sponsorship no tabata hopi popular. Esaki e la hasie mirando e entusiasmo y e gana di e hobennan pa practica e deporte. Pero esaki a cuminsa bira pisa pa su persona y a evalua pa stop e team. Tumando e decision aki un sponsor a presenta y e decision pa sigi cu e team bow di nomber nobo “FASCO” a wordo tuma. Cu e team bou nomber nobo tambe Gerardo ta logra titulo di campeon. Un pelotero cu e no por lubida, ora e papia di “FASCO” ta mr. Toribio “Boei” Briezen.
Banda di baseball, Gerardo tabata un persona hopi dedica na su trabao. Un persona cu casi 40 aña como hefe di accounting department. El a cuminsa elabora na Hollandse Bank, despues a bay ABN AMRO y despues e no ta corda e nomber. Gerardo hariendo ta bisa: “e banco a cambia asina hopi nomber cu mi no ta corda nan”, durante un entervista teni cu persona. Su trabao nunca a strobe di aporta na loke mas e ta gusta, cual ta e deporte di baseball. E enfoke den baseball tabata pitcheo. Un persona certifica pa Dick Mills. Tur anochi Gerardo ta wak 2 wega di college mas esunnan profesional. Puntrando si tin diferencia den baseball cu e conoce compara cu loke e ta wak actualmente, e ta bisa: “Tur cos cu bo haci den bo bida, un dia ta hiba bo bek na bo basics. Kemen baseball en berdad a cambia, nan a pone un tiki mas “style” aden, pero na final tur hungado ta bay bek na e basis di baseball. Tur cos a cuminsa cu buki, despues a bay video, despues tabata DVD. Awo ta “You Tube” mi ta subi pa wak tur cos”. Ora nan bise cu baseball a cambia, su contesta ta facil: “e bala no a cambia, e ta mes un rondo”.
Despues cu el a maneha team nan den A klas pa 5 aña, Gerardo a dicidi cu ta ora pa e bay inverti su tempo den e muchana mas chikito, y aki ta caminda cu el a cuminsa maneha team nan di edad nan 6 aña bay ariba. El a haci esaki bou di diferente liga, no unicamente ABBA. Pa Gerardo e no ta importa cua team of cua organisacion e mucha ta hunga, basta e por aporta na e deporte, e ta haci’e. Gerardo ta unico persona cu a representa Aruba y gana titulo nan den exterior pa tur 3 division na Aruba, esta South, Center y North. Elaborando un tiki riba baseball den exterior, nos a haci e pregunta si tin persona cu a wordo firma, cu tabata bou di su maneho y e ta corda 2 di nan hopi bon: Robby Albertus y Bryan Lampe. 2 hungado cu a wordo firma pero no a logra yega MLB.
Durante e entrevista, Gerardo a conta nos basta storia cu e la pasa aden, cual a trese un sonrisa na su cara. Un di nan, claro ta di nos pelotero professional, Xander Bogaerts. E ta corda cu Xander tabata hunga pa PEPSI mientras Gerardo tabata maneha Centro di Bario Lago Heights su team. Asina mes Gerardo tabata busca Xander y su ruman, hiba nan veld di PEPSI pa nan por train, y despues e ta bira bai otro veld pa e train su team. Durante wega, su team ta gana PEPSI y Xander tabata rabia masha hopi mes cune. Ainda awe Xander ta rabia cune, specialmente ora e bai bishita Gerardo, algo cu no ta keda sin pasa ora Xander ta di bishita na Aruba, y e ta haña Gerardo bisti cu su pechi di NY Yankees. Hariendo Gerardo ta bisa nos su contesta na Xander: “no worry Xander, mane bo contract caba, nos ta firma bo pa bo tambe bin Yankees”.
Asina aki tin hopi storia cu nos por conta di un persona cu a y ta dedica hopi tempo pa e deporta aki di baseball. Awe cu su 80 aña, e ta juda e ekipo di su yui homber Rockets di Sta. Cruz. Gerardo lo ta encarga di tira e prome bala durante e ceremonio di apertura y e la manda e mensahe masha cla y raspa: “porta mi no lo tira 90 mph pero just wak mi edad, mi ta sigur mi por tira esei si”. Gerardo su ultimo palabra nan durante e entrevista tabata: “The Way you Practice is the Way you Play. Muchanan awe ta jega veld sin gana pero kier dal hit so den wega. E no ta bai. Si bo no hasi nada na training, bo no lo hasi nada na veld. Duna 100% tur ora y bo lo wak e resultado durante wega”.