Minister di Infrastructura Benny Sevinger ta splica dicon e proyecto di Watty Vos Boulevard ta importante. El a duna di conoce cu esaki ta un proyecto di 30 aña pero a pone na nomber di Watty Vos pasobra e tabata un hende cu a haci hopi pa Aruba.
E mandatario a splica cu Watty Vos Boulevard no ta un simpel caretera, sino e ta dedica na un persona, un gran politico, un gran ciudadano, sr. Watty Vos, manera ya indica. Minister Sevinger a haci reconocimento na e famia y tambe na fundacion Watty Vos.
Sr. Watty Vos no ta desconoci. Un persona cu a traha tambe riba e caretera aki pa hopi aña como minister di infrastructura e tempo ey y awe por ta orguyoso cu e caretera aki, un di e careteranan mas principal di nos pais, ta bay wordo dedica na sr. Watty Vos, qepd.
Tin cu agrega cu e proyecto aki, tin mas cu 30 aña ta papia riba dje. Cada Gobierno a traha riba dje. Un mas cu otro. Pero sinembargo e Gobierno aki ta e Gobierno cu a dicidi cu ta bay finalis’e, ta bay ehecut’e. E Gobierno a dicidi di pak aan 4 di e proyectonan mas grandi di e pais, cual lo bay conoce den e proximo añanan nos dilanti.
E proyectonan aki, manera cu tur a bisa, tin tres aspecto den dje. Uno ta e parti social, pasobra no ta simplemente un caretera cu ta bay conecta A cu B. Pero ta bay tambe drecha e calidad di bida di tur nos ciudadanonan den tur aspecto. E careteranan aki tin di haber cu tur ciudadano di nos pais. Tur ciudadano di nos pais lo bay pasa riba e careteranan aki y lo bay tin un alivio pa nos ciudadanonan na momento cu nan ta transita riba e careteranan aki.