Dentro di e proximo tres lunanan camindanan en conexion cu Watty Vos Blvd lo keda habri
Diamars atardi miembronan di prensa a ricibi un recorido conhuntamente cu Minister encarga cu Infrastructura Otmar Oduber riba henter e proyecto di Watty Vos Boulevard (WVB), pa cual nan a ricibi splicacion di Director di DOW Marlon Croes di e trabounan cu a tuma luga y tambe informacion di con leu e trabounan ta. Pa cual ta premira cu dentro di 3 luna e proyecto lo finalisa.
Minister Otmar Oduber a splica manera treci dilanti na numeroso ocasion cu WVB ta un proyecto PPP. Esaki ta significa cu unabes cu e proyecto wordo finalisa, e lo keda wordo manteni tambe door di e grupo. E mandario a duna di conoce cu na diferente momento a tuma mas tempo den e proyecto pa percura pa tin un bon producto pa cual hopi tabatin di haber cu e problema di awa cu tabatin den diferente bario rond di Aruba, pa cual a percura pa inversionnan adicional tuma luga. A percura pa e adaptacionnan necesario pa por atende cu e problemanan aki, pa na final di dia ta mas sigur cu lo tin un proyecto di bon calidad pa futuro.
E presion cu a pone di parti DOW riba e control y ehecucion di e proyecto ta conduci cu tin un proyecto, (si compare cu Green Corridor cu a costa un aña y mey adicional prome cu e finalisa), cual ta premira cu e lo tuma solamente 3 luna adicional. Pues ta spera cu October lo por haci henter e caminda accesibel cual ta significa cu pa December, prome cu dianan di fiesta y high season pa turismo, cu e proyecto lo ta completamente entrega cu tur detaye y landscaping.
Acerca di esaki Minister Oduber a bisa: ‘Na comunidad di Aruba cu hopi bes a pidi pa carga pasenshi cu e camindanan cera, poco poco por mira cu ta yegando na e punto cu e camindanan lo ta accesibel un bes mas.’
Pa conclui, Mescos cu a siña for di Green Corridor, Gobiero ta reconoce cu tin hopi cos pa siña di e proyecto aki tambe. Segun Minister Oduber e extra presion cu a pone riba control di e trabounan a percura pa e contratista ta hopi mas ‘up to par’ cu e condicionnan di Gobierno y cumplimento cu contract. Pues, locual cu comunidad por spera ta cu dentro di tres luna lo mira cu lo habri mas y mas caminda, acelerando e trafico drasticamente y calmando e trafico di den centro di ciudad.