Manera ta conoci, dr. Carlos Yagua-Fingal a yega edad di pensioen y ta pa e motibo aki mes su contract a yega su final. Vocero di AZV, Solange Tchong a splica nan ta bezig pa un reemplazo temporal, cu ta duna servicio na e pashentnan di e dokter.
Sinembargo ta bezig. Aworaki e organo ta den combersacion cu hospital. E idea ta p ayuda e pashentnan aki na entre otro e localidad di Huisartsenpost (HAP) na Hospital. HAP awor aki ta specialmente pa casonan cu mester di un dokter di cas pafo di e orarionan normal y poco urgente. E ora ey por acudi na HAP desde 6’or di atardi te cu 9’or di anochi.
Pero t’asina cu AZV ta den combersacion cu hospital, manera ya indica, pa por logra haya e localidad ey pa pone un reemplazo temporal (un dokter di cas) mas pronto posibel pa asina atende e pashentnan di dr. Carlos Yagua-Fingal.
Pa e pashentnan aki cu ta un cantidad di 1950 pashent, kier a informa nan cu e siman aki e intencion ta pa AZV saca detayadamente pa nan kende lo bay bira e dokter di cas cu lo reemplasa dr. Carlos Yagua-Fingal, kende a yega edad di pensioen y pa e motibo aki no tin contract cu AZV mas.
Lo por dura algun dia mas pa por concretisa e contract aki cu hospital y dokter di cas nobo cu kier pone como reemplaso di e dokter ya menciona.
Den e mesun rosea ta indica cu prome biaha ta den e situacion aki. Tin hopi mas idea pa loke ta dokternan di cas. Pero a wanta esakinan un rato pa asina regla tur otro cos bon.
Tambe tin e otro grupo di pashent cu ta cerca dr. Norma Yagua-Velazquez cu e siman aki por ricibi servicio cerca dje.
Pa nan tambe, dentro di poco, lo saca informacion kico lo bay bira, ya cu dr. Norma Yagua-Velazquez tambe a avisa cu e kier bay finalisa of para cu AZV.
Den su caso ta asina cu ta informa tur pashent cu nan si por keda haci uzo di e servicionan di dr. Yagua-Velazquez, contrario cu e pashentnan di dr. Carlos Yagua-Fingal.
AZV ta spera cu den e dianan aki e contract cu e dokter nobo lo ta concretisa. E ora ey lo saca e informacion aki pa publico.
Desde dia 5 di juli, esunnan cu tabata pashent di dr. Carlos Yagua-Fingal, si en caso mester di cuido medico, evalua bon si ta un cuido medico urgente y necesario pa por bay un dokter di cas, por haci uzo di e servicio di Huisartsenpost atardi 6’or cu ta na hospital, pa asina haya cuido te na momento cu AZV ta spera cu den transcurso di e siman, por duna den concreto kende ta bira e reemplaso oficial y temporal pa dr. Carlos Yagua-Fingal.
Tchong ta agrega cu AZV tin di comprende cu tin algun dokter cu tambe lo kier desea di stop, pero cu esaki ta den combersacion cu hospital.
Pero ta mucho trempan pa bisa esey. Por lo tanto e servicionan ta sigui di e dokternan di cas aki, te na momento cu tin confirmacion sigur, e ora ey AZV lo sali cu e informacion aki.
Tambe tin semper e custumber cu normalmente ta saca un carta pa e asegurado (pashent) pa inform’e cu den e caso aki, door cu no tin tur detaye cla, esaki mes ta e motibo pa cual no a manda ningun carta ainda pa e pashentnan aki.