E patruyanan intensivo di Wardakosta i Defensa ta dunando e efekto nesesario. Ultimo tempu no a detektá ningun yegada di botonan ilegal riba nos islanan. Pesei Wardakosta lo siguí ku e patruyanan intensivo pa kontrolá e fronteranan marítimo di Aruba, Boneiru i Kòrsou. Pa por ehekutá e patruyanan, Wardakosta lo siguí risibí asistensha di unidatnan di Defensa den forma di e barku di Marina Real Zr.Ms. Zeeland ku su helikòpter NH-90, patruyanan riba tera ku e vehíkulonan Anaconda, militarnan riba tera i riba laman. Na Aruba Wardakosta ta hasi uzo di un Unmanned Aerial Vehicle (UAV) pa kontrolá e frontera. E UAV aki tambe ta forma parti di e asistensha di Defensa den Karibe na Wardakosta.
E meta di e vigilansha di frontera ta pa evitá botonan yega tera di un forma ilegal. Sigur mirando ku aktualmente Sur-Amerika tin un brote di COVID-19. Na e parti di mundu akí ainda no ta logrando kontené e vírùs ku a kosta bida na miles di persona i kaminda tin hopi habitante infektá. Nos islanan tin e COVID-19 bou di kòntròl i nos lo ke mantené asina. Esaki ta di sumo importansha pa kresementu di e ekonomianan lokal i pa krea stabilidat riba e islanan.
Wardakosta ta hasi un súplika na habitantenan pa na momento ku mira algu sospechoso òf peligroso riba laman òf na kosta, pa yama Wardakosta riba e number 913.
E number akí ta alkansabel di dia i anochi. Barkunan riba laman tambe por tuma kontakto ku e Sentro di Reskate di Wardakosta via di e kanal VHF 16 na momentu ku nan mira algu sospechoso òf peligroso riba laman.