Wardacosta ta tuma nota cu regularmente personanan ta sigui tira pisca cu harpun sin cu nan tin un permiso. Den e ultimo temponan aki Wardacosta a haya nan mes cu diferente di e casonan aki. Wardacosta kier recorda tur persona y usuario di harpun riba e leynan vigente ariba uso di harpun.
Na november 2020 Gobierno di Aruba a introduci un asina yama ‘gedoogbeleid’ cual ta haci e uso di un harpoen den lama legal. Sinembargo esaki ta mara na diferente condicion cu e usario mester tene su mes na dje. Un suplica ta bai pa e usuarionan studia e condicionnan aki bon pa por compronde kiko ta permiti ora ta pisca cu harpun. Den caso cu un di e condicionnan aki wordo viola, e ‘gedoogbeleid’ lo no ta na vigor mas y e ambtenaar di Wardacosta of Polis por actua a base di e ley existente (landsbesluit verboden onderwaterjachtmiddelen).
Wardacosta kier a pone enfasis cu den e zonanan cora manera indica riba e mapa adhunto no ta permiti pa tira pisca y tampoco no ta permiti pa ta den posesion di un harpun. Unico excepcion pa posesion di harpun den areanan cora ta si e harpun ta poni den un boto pa asina por sali pa bai den areanan permiti of drenta bek. Un persona no por sali for di canto di lama y landa cu su harpun den man pa asina e bay den e area cu ta permiti, vise versa tampoco no ta permiti. Pues cu otro palabra no por pasa landa den area prohibi cu harpun den man pa yega tera.
Na momento cu Wardacosta tuma nota di un tiramento di pisca sin cu tin un permiso pa esaki Wardacosta lo actua debidamente. Piscadonan cu kier haya un permiso pa pisca cu harpun por bishita Sta. Rosa pa ricibi tur informacion tocante un permiso. Wardacosta ta informa cu personanan cu ta mantene nan mes debidamente na tur e reglanan manera stipula den e ‘gedoogbeleid’ lo no haya nan mes den un situacion unda cu autoridad lo mester actua contra nan.