“Ta e intencion pa intensifica e control nan cu nos tin awor aki y ta mas activo den combati ilegalidad riba nos isla”, asina Gerald Vingal, director di Migracion Aruba a duna di conoce diabierna anochi despues di a caba di procesa 9 stranhero indocumenta, cla pa deporta nan for di nos isla. “Ta necesario pa tanto e comerciante cu ta trece nan como pa e stranhero mes realisa cu ta importante regla nan permiso na tempo, pa evita inconveniencia”.
Tabata diabierna pa 7:00pm cu un ekipo combina di 10 efectivo di Migracion Aruba y Warda nos Costa a sali pa un control na establecimentonan comercial. E prome pa ricibi bishita tabata Budha Restaurant cu tabatin su empleadonan cu permisonan na ordo, mescos tabata Dunkin Donuts na Tanki Flip cu tambe tabatin tur permiso na ordo. E storia a resulta diferente ora a bay controla esunnan trahando na e kiosconan dilanti South Beach, e kiosconan dilanti Playa Linda y un Carwash na Palm Beach.
Na tur Warda nos Costa a detene no menos di 9 persona cu no tabatin nan permiso den nan poder. Despues di control na oficina a resulta cu tur tabata kedando ilegal riba nos isla, sin permiso di estadia y sin permiso di trabou. A drenta como “turista” pero a surpasa e dianan otorga na nan ora a “klaar in” na Inmigracion.
E nacionalidad di e ilegalnan tabata Filipino, Ecuatoriano, Colombiano y Venezolano. Ta bon pa enfatisa cu den caso di e 2 Venezolanonan, ambos tin mas o menos 1 aña trahando ilegal riba nos isla. Ta bon pa enfatisa cu durante e control aki ta enfoca riba e trahado pero tambe riba e dunado di trabou, cu ta haci su mes culpabel na un delito castigabel pa ley cu multanan cu ta varia pero por resulta den un suma hopi halto.
Dia 19 di Maart 1969 a funda e prome departamento di Inmigracion bou di Cuerpo Policial di Antias, den forma di “Sectie Vreemndelingen Politie Luchthaven”. Dia 1 di September 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion. Trabounan sinembargo ta den fase final pa dia 1 di Januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa. Te awor Servicio di Inmigracion ta consisti di mas o menos 60 empleado mientras cu Warda nos Costa ta conta cu 16 empleado.