Willemstad, CORSOU- E Centro pa Rescate y Coordinacion di Warda Costa diadomingo a ricibi un melding cu un señora posiblemente lo a kibra su enkel pa cual e no por a baha ariba propio esfuerso for di St. Christoffelberg. Bomberonan tambe a wordo poni na altura pero nan no por a yuda e señora.
Esaki a pone cu a dicidi di haci uzo di e helicopter di Warda Costa, e AW 139. Esaki a yega rapidamente na e sitio y a lanta e señora for di e sero, haciendo uzo di un “hoist” y el a wordo hiba pa centro di apoyo di Warda Costa na Hato. Eynan personal di ambulance cu tabata wardando ariba e señora, a tum’e over, y el a wordo traslada pa hospital.