Warda Costa di Caribe a detene 51 ilegal Venezolano diamars marduga na Corsou, ora cu Warda Costa a intercepta un di e go fastnan bayendo direccion zuid. A manda dos super Rhibs y un helicopter pa e go fast. Tambe a manda un patruya terestre di Warda Costa pa Fuik, y despues di investigacion a gara 19 persona, di cual 9 tabata hende muher. Probablemente e dos go fastnan a baha nan eynan. Tur 19 persona tabata Venezolano y nan a wordo entrega na Cuerpo Policial di Corsou.
E dos super Rhibs a intercepta e dos go- fastnan den awanan teritorial di Corsou. E prome go fast tabata zuid di Caracasbaai, y aki Warda Costa a bin encontra 30 persona, mientras cu e otro tabata zuid di Fuik tabata tin 2 persona. Ambos boto a wordo hiba pa e punto di sosten di Warda Costa na Parera. En total Warda Costa a detene 14 hende muhe y 18 hende homber, tur di nacionalidad Venezolano. E grupo aki hunto cu e otro 19 persona a wordo entrega na polis. E caso ta sigui bou di investigacion.