Curacao: Wardakosta di Karibe Hulandes a enterseptá un kantidat rekòr di kasi 5.500 kilo di kokaina dia 25 di febrüari último.
E logro akí ta un resultado di un kolaborashon entre Wardakosta Karibe Hulandes i Marina di Colombia. Wardakosta tabata monitoria e bulk carrier Aressa pa algun tempu kaba via di su sistemanan di sensor. Despues di sinkronisá ku Ministerio Publiko na Aruba i partnernan internashonal, Wardakosta a detené e boto ku tabata nabegá den area di Aruba.
E boto Aressa tabata nabegá for di Venezuela ku destinashon Grecia. E interseptashon a ser ehekutá djamars último pa un tim di Metal Shark di punto di sosten di Wardakosta na Aruba despues ku a detektá Aressa riba e sistemanan di radar i despues pa e helikòpter AW-139. E bulk carrier Aressa a ser dirigí pa e tim di Metal Shark direkshon di Oranjestad kaminda Wardakosta konhuntamente ku KPA i raidingsquadron 32 di Defensa a hasi un búskeda profundo riba e boto. Na bordo a enkontrá un kantidat grandi di droga. E tripulashon konsistiendo di 11 persona prosedente di Montenegro a ser detené.