Bureau Sostenemi, Fundacion Respeta Mi, Ministerio di Asunto Social, Fundacion Pa Nos Muchanan, Tienda di Educacion y Wit Gele Kruis a traha hunto pa e bunita actividad ‘Derecho di Mucha ta conta!’ – #STOPAWO 2016 pa e muchanan di scol preparatorio.
For di aña 2015 e actividad aki ta forma parti di e campaña #STOPAWO inicia pa Minister di Asunto Social, Hubentud y Labor drs. Paul Croes, cual tabata un exito na 2014.
Meta di e actividad ta pa papia den klas cu e muchanan di edad 4 pa 6 aña tocante e derechonan di mucha. A trata specificamente e derecho di mucha cu e klas a scoge na inicio di e proyecto cu a culmina dia 20 di November Dia Internacional di Derechonan di Mucha.
E aña aki 16 scol a inscribi cu 41 klas y un total di 1041 alumno. Scolnan participante: Stichting Katholiek Onderwijs Aruba, Dienst Publieke Scholen, Stichting Protestants Christelijk Onderwijs Aruba, Stichting Volle Evangelie Onderwijs Aruba y Stichting Onderwijs CombinA.
E preparacion tabata basta intensivo mirando cu henter e klas mester a forma parti di e proyecto. Na final mester a traha un proyecto creativo di e derecho di mucha cu e klas a scoge. Tabatin 4 categoria: cantica of poesia, collage, obra di man, sketch of storia den movecion. Luna di Movember 14 scol cu 31 klas y un total di 772 alumno a entrega nan proyecto.
Dia 24 Ni november Arubus a busca e klasnan nomina y transporta nan pa Piedra Plat Entertainment Center. Den un sala masha bunita decora den presencia di Minister di Asunto Social, Hubentud y Labor y demas invitadonan e 8 klasnan nomina por fin a haya sa kendenan a sali ganado den nan categoria.
E huradonan Anchie Maduro, Ron Martes, Juliette Pablo, Marko Espinoza, Elsa Krosendijk, Aldrich Dijkhoff y e hobennan Roslin Schwengle, Jayleen Croes y Sheqayli Ascencion sigur no tabata tin un tarea facil.
Pabien na tur scol cu a participa. Gana ta dushi, pero participa mas leuk ainda.
E prome premio pa tur categoria ta e pakete ‘Cunukito di bishita na Santa Rosa’ y e segundo premio pa tur categoria ta e pakete ‘Wantomba na Fantastic Gardens’.
Ganado prome premio categoria cantica of poesia: Trupial Kleuterschool; categoria obra di man: Anglo Kleuterschool; categoria collage: Trupial Kleuterschool; categoria sketch: Prome Paso Scol Preparatorio. Ganado segundo premio categoria cantica of poesia: Faith Revival School; categoria obra di man: De Schakel; categoria collage: Fontein Kleuterschool; categoria sketch: Anglo Kleuterschool.
Un gradicimento di curason pa nan tremendo colaboracion cu e activitdad ‘Derecho di Mucha ta conta!’ ta bay pa Piedra Plat Entertainment Center, Bright Bakery, Santa Rosa, Fantastic Gardens, Arubus, Manrique Capriles, Flora Market, André Geerman y Instituto di Cultura pa e wantomba Jhon Freddie Montoya.
Nos kier corda un y tur cu na 2001 Aruba a ratifica e Tratado Internacional di Derecho di Mucha. Cu e ratificacion henter nos comunidad tin e obligacion pa implementa e derechonan aki. Bienestar y siguridad di nos muchanan ta keda e responsabilidad di cada adulto. Nos tur mester ta consciente cu di berdad ta tuma un comunidad pa lanta y proteha un mucha!