NEW YORK CITY, New York – E principal indicenan di e bolsa di New York, a cay diahuebs, cu inversionistanan preparando pa un otro hisamento mas di e tasanan di interes na Merca y despues cu e pais a ordena sancionnan nobo contra Noord Korea.
E indice S&P 500 y e Promedio Industrial Dow Jones, a corta un racha di ciere record y e accionnan di Apple tabata un lastramento principal di e tres indicenan principal, cu un caida di 1,7 porciento pa e temor riba e demanda di nan iPhonenan nobo.
E inversionistanan a reforsa nan apuesta cu e Reserva Federal lo bolbe subi e tasanan di interes e aña aki tras di e comunicado di su ultimo reunion y tambe nan a evalua su decision di cuminsa na reduci e balancesheet di 4,2 biyon di dollar den bononan di Tesoro y balornan respalda pa e hipotecanan.
E presidente di Merca, Donald Trump, a anuncia diahuebs, sancionnan cu lo amplia e cantidad di persona y organisacionnan cu no por haci negoshi cu Noord Korea.
E promedio Industrial Dow Jones a perde 53,36 punto, of un 0,24 porciento, na 22.359,23 punto y e Indicce S&P 500 a cay, 7,64 punto, of un 0,30 porciento, na 2.500,60. E indice Nasdag Composite a perde 33,35 punto of un 0,52 porciento y a caba den 6.422,69 unidad.
Solamente dos di e 11 sectornan principal di S&P, e financiero y e industrial, a caba cu e ganashinan di 0,2 y 0,3 porciento, respectivamente. Esun di consumo basico a registra perdidanan mayor, cu un caida di 0,97 porciento.
Fuente: www.reuters.com