E artista polifacetico, Waldy Simson, diabierna ultimo, dia 19 di Januari, a haci entrega di un coleccion di articulonan di corantnan for di e periodo di 1993 te cu 2017, den cua ta relato bida, trabounan y arte di Simson. Via e articulonan aki por sigui un parti grandi di carera internacional di e artista aki.
Hunto cu esaki Waldy Simson a haci entrega tambe na director di Archivo Nacional, Raymond Hernandez, copia di un potret riba cua e ta parece hunto cu Nelson Mandela, luchador di libertad y ex presidente di Sur Africa. Waldy Simson, despues di a realisa diferente exposicionnan na Aruba, Bonaire, Surnam y Jamaica, na 2008 a haya e oportunidad pa presenta un exposicion na Nelson Mandela Museum na Qunu, Sur Africa. Y riba 21 di juli 2008 Simson tabata tin e honor di topa cu Mandela na ocasion di celebracion di 90 aña di su nacimento.
Archivo Nacional a gradici Waldy Simson pa e gesto aki y sigur e material obsekia, lo ta warda pa tur esnan cu kier sa mas tocante e trayectoria di e artista aki.
Tambe por bishita e exposicion di Waldy Simson na su cas, na Kas Ariba 28-F, Santa Cruz, cuminsando dia 25 di januari, riba dia di Betico y ta termina te cu diadomingo 28 di januari.
Pa tur esnan cu ta interesa por bishita facebookpage y youtube di Waldy Simson, of tambe su website artisit.webs.com.