SICILIA, Italia- Mount Etna, ubica riba e isla Italiano di Sicilia, poco poco ta schuif bay pa lama Mediterraneo, según un grupo di cientificonan. Nan a adverti ademas di cu e cambionan den e volcan activo lo por desencadena derumbenan catastrofico y tsunaminan devastador.
Un estudio, publica den e Boletin di Vulcanologia a confirma pa prome biaha cu e volcan ta move den direccion oost-zuidoost, direccion e ciudad di Giarre, y na un velocidad promedio di 14 milimeter pa aña.
“Esaki ta prome biaha cu esaki ta pasa cu’n volcan activo”, segun e autor principal di e estudio, John Murray, di Open University di Reino Uni. “Esaki ta conoci di ta sosode cu volcannan extinto, esaki ta prome biaha cu por prueba cu un volcan ta move asina ey”.
E investigadonan a logra determina e movimento despues di a moniterea e volcan durante 12 aña, cu apoyo di mas di 100 station di GPS ubica rond di Mount Etna.
Aunke cu e volcan ta schuif na manera slow, esaki no kiermen cu e no ta representa un menasa directo, Murray ta kere cu ta importante “sigui monitor, pasobra si algo sosode, e efectonan lo ta catastrofico”.
“Ora cu studia e registronan geologico di e volcannan extinto, particularmente den Suramerica, tin hopi cu ta riba un bahada, di manera similar”, Murray a bisa. “Mayoria di nan, mas aleu den nan historia, ta mustra colapsonan catastrofico di un banda di e bahada. Dus, nos sa cu esaki ta un situacion hopi preocupante den un futuro lehano”.