BELGICA/MALTA – Un avion di Ryanair cu tabata cubri e ruta entre Bussel y Malta, a haya su mes ta desvia, despues cu a surgi un pelea entre varios di su pasaheronan den pleno vuelo, e corant Belga Het Nieuwsblad, a informa.
E suceso, cu a sali na cla diadomingo, a tuma luga diahuebs, abordo di un avion cu a lanta vuelo for di e aeropuerto internacional di Brussel-Zaventem cu destino Malta, ora cu varios pasahero a basha konopi durante varios minuut pa causanan cu a keda desconoci.
Segun por a aprecia riba e video graba pa un pashero y publica riba e version digital di e corant Belga Le Soir, varios homber a cuminsa discuti den e gang di e avion pa despues agredi otro fisicamente y di forma hopi violento dilanti di e resto di e biaheronan.
E tripulacion di cabina a interveni pa rebaha e tension y e piloto a yama na calma atrabes di e megafon, pero mirando e situacion, el a dicidi di desvia di e ruta premira y a haci escala na e ciudad di Pisa.
Cuater pasahero a haya nan mes obliga di baha for di e avion y aresta na e aeropuerto Italiano.
“Esaki ta totalmente inaceptabel,” por a scucha e piloto bisa den e video, cu a dirigi na e protagonistanan di e incidente atrabes di e megafon, poco despues cu e stewardessnan a anuncia e desvio y a pidi pa e pasaheronan bay bek na nan asiento y mara faha di siguridad.
Tras e incidente, e compania a afirma cu “nan no ta tolera tal comportacion riba nan vuelo” y cu “e siguridad di su pasaheronan y personal ta nan prome prioridad,” segun declaracionnan haci y publica pa Het Nieuwsblad.
No ta prome biaha cu un vuelo tin cu desvia pa un pelea abordo: na 2013 dos jet a escolta un avion di Pakistan International Airlines, cu a cubri e ruta Lahore (Pakistan) – Manchester (Reino Uni) despues di un fuerte pelea caminda cu dos homber a purba di drenta den e cabina di e avion y e piloto a dicidi di desvia e vuelo pa Stansted, cerca di London.
China di su parti, a introduci na Februari un “black list” di pasahero cu ta inclui esnan cu ta comporta di forma violento, cu ta menasa of insulta personal di vuelo of provoca otro tipo di disturbio.
Fuente: NTN24