Diaranson mainta Corte a dicta fayo den caso entabla door di votadonan pidiendo reconteo. A rechaza nan peticion pero nan a dicidi mesora pa apela.
Awe Corte den prome instancia a anuncia su decision riba e caso cu algun votado a cuminsa pa reconteo di votonan di eleccion di dia 25 di juni ultimo.
Ta trata aki di Arthur Dowers, Mike de Meza y Mervin Wyatt Ras, kende a cuminsa e caso como votado y no como candidatonan di AVP. Nan peticion a wordo rechasa y na mesun momento a compronde for di nan abogado mr. Desiree Croes cu a apela. Tamb a bay un carta pa Conseho Supremo Electoral, informando nan di e decision pa apela.
Huez a bisa den e sentencia cu e ta di acuerdo cu Conseho Electoral cu e peticion pa reconteo no ta compaña pa motibo hustifica of hechonan concreto cu ta pone Corte tuma e decision pa bay di acuerdo cu nan peticion di reconteo.
En general, den e sentencia ta para cu sea no a splica nan puntonan cu suficientemente bon y prueba pa por bay di acuerdo cu nan of loke nan a trece dilanti no ta prueba nan ponencianan.
E tres ciudadanonan cu a cuminsa e caso a trece padilanti prueba di foto di formularionan di votacion. Riba esakinan por mira con decision diferente a wordo tuma den caso di voto pa lider di RED compara cu esun di lider di AVP, mientras cu e voto ta di e mesun forma yena. Pero Hues a cuestiona con nan a haya e formularionan ey y a bisa cu voto di cada ciudadano ta secreto pa cual no por uza e potretnan den e caso aki como prueba di ponencianan.
Pa Arthur Dowers e resultado ta mustra cu e Hues tabata mas preocupa cu e Gobierno sinta cu sirbi democracia. El a bisa cu e ta mas preocupa pasobra tin algun hende huramenta caba y p’esey, Dowers ta kere, cu no a sirbi interes di votado den e caso aki. E hues a bay mucho leu cu su argumentonan, buscando forma pa evita un reconteo. Hasta e ta insisti cu e formularionan di votacion, den e prome caso, mester wordo destrui, segun Dowers. El a cuestiona e forma con e Magistrado a trata e caso aki, en bes di pone un fecha hopi pa trata un caso sumario, a pone esaki trece siman mas leu. Despues a tuma otro tres siman, pa tuma un decision cu ta similar na esun di caso di orde maatregel.
Lo bay bodemprocedure, y nan no sa si lo destrui e formularionan. Dowers ta sinti si cu otro interesnan ta wordo sirbi den e caso aki, cu ta derecho di e votado pa pidi un reconteo.