Despues cu e legendario team di Tecnicos La Moderna a ricibi un palisa “legendario” na J & J Snack na Saliña Cerca, a yega turno pa e “sicarionan” di Jos “sluwe vos” Kelly bay den neishi maribomba na Sabana Grandi caminda Jo Geerman hunto cu su “militancia” tabata warda nan diasabra ultimo pa regla cuenta. Tecnicos a haya un siman pa mane na Hulandes ta bisa “lik zijn wonden”, y refleha bon ta kico por a bay fout cu nan a haya e sota cu awo ta conoci den boca di pueblo na Noord como “e massacre na Saliña”. No ta “zomaar een sota”, si no 10 – 0 Tecnicos La Moderna a haya y ta mas cu claro cu e tak’i biljart nan di e gang di Macuarima a keda ta kishiki y grawata mahos!
Pues asina ey e di dos buelta di e copa rotativo “Jo Geerman” ta cuminsa na Sabana Liber. E copa ta den poder ainda di Tecnicos, pero ta sumamente duro pa nan bay keda cun’e despues di ultimo derota. Sinembargo Tecnicos ta sorprende famia y amigo door di habri duro contra J & J Snack!! Nada menos cu e grandmaster den weg’i sconde bola, Sheik Orman, ta haya un “sopa de propio chocolate” cerca Bencho, y Tecnicos ta habri e score cu 1 pa 0! Den di dos wega un Garrick mal rabia ta baha pisa ariba “Lucky Luke” Tromp, y fanaticada di Tecnicos por dal un grito di euforia ora nan team ta dilanti cu 2 – 0!! Ta parce cu horcan “Vos” a debilita ariba tera te na un depresion tropical!
Jossy ta obliga di saca su cañon nan di caliber pisa! E temibel Johnny “Indiaanse Herder” Tromp ta gana Fein, y e legendario Mike Smolders ta gana Pedro, pa asina aki e bataya nivela na 2 – 2!! “High tension in the big savanna” ora cu legendario Jo Geerman enfrenta Jos “sluwe vos” Kelly!!! Ni ki triki “sluwe vos” purba, Jo Geerman ta mustra Jossy cu “mas sabe el diablo por viejo que por diablo”!! Jo sensacionalmente ta gana Jossy y asina aki Tecnicos La Moderna ta ariba cu score di 3 – 2!! Cu man ta tembla Tecnicos ta pone nomber di Moonchi ariba bordji, ya cu’n siman prome el a haya dos capoti liña-liña cerca Gorilla! E biaha aki ta Robby “Base” Tromp ta mustra Moonchi cu tin un “tijd van komen, en een tijd van gaan” y ta nivela e score na 3 – 3!!
Y aki ta caminda e rabo di porco ta krul! Ta resta un hungado di ambos team pa caba wega! Ta toca n’e guy cu nunca ta papia duro, Errol Tromp di J&J, contra Blanco di Tecnicos. Den un bon wega, Errol ta sigura victoria pa J&J Snack cu score di 4-3, y cu alegria e caravana di victoria ta sali pa Noord, y dal un bishita na La Roca pa dal un blof chikito cu e trofeo. Na Saliña Cerca, Jos “sluwe vos” Kelly ta dal e copa rotativo Jo Geerman un mordi chikito estilo Rafael Nadal, y di e forma aki e copa e biaha aki ta keda den poder di J&J Snack. E score total ta 1 – 1, y e siguiente encuentro lo ta 18 di Maart 2017 pa wak ken lo bay cu e copa. Esun cu gan’e 3 biaha lo keda cune definitivamente!
Keda pendiente…